世盃未完波衫舖減定價

猪拉多纳

睇世界盃除咗飲同食外，有樣嘢一定唔少得，就係波衫。無論男女老幼，只要着上邊隊波衫就代表你撐邊隊，唔單止係身份象徵，隨時識到唔少朋友添！

阿謙身邊嘅朋友都習慣世界盃前買定愛隊嘅波衫，再印埋偶像嘅名字冧巴，覺得咁做件波衫先「有靈魂」。不過，佢哋都呻話依家波衫好貴，一件波衫連埋印字隨時要7舊水先落到樓，但世界盃4年一次，所以佢哋都係邊話貴邊畀錢。

記得英格蘭對意大利之前嗰日，阿謙喺網上見到有啲波衫舖竟然做特價，英意兩隊波衫連字竟然5舊水有找，之後睇波時撞到一位波衫舖做嘢嘅老友，梗係趁機請教佢係咩一回事。

呢位叫Thomas嘅老友就解釋：「其實出現呢啲情況係因為世界盃雖然開打冇耐，但新一季歐洲聯賽好快就到。啲舖頭自然要騰出空位去接歐洲球會嘅新貨，最快方法就梗係減價清晒世界盃波衫。」

咁早買嘅朋友捱貴衫咪好唔抵？Thomas就話：「俗語雖然話『早買早享受，遲買多折扣』。但其實好多減價貨啲Size都唔係好齊，隨時出現斷碼情況，而且可能只有某啲冷門球員嘅名同號碼畀你揀，始終唔及初初推出時咁齊全，所以早買始終着數啲嘅。係喎阿謙，你買咗波衫未？」呢個時候下半場啱啱開番，都係睇波先！