哥倫比亞氣勢吞象

猪拉多纳

拉丁歌后鋪相力撐 粉絲逼爆場

今晚世界盃由C組哥倫比亞對科特迪瓦打頭陣，兩隊首輪旗開得勝，睇比賽過程，哥倫比亞明顯贏得較有說服力，眾將名氣欠奉，但鬥志十足，全場搏到盡，歸根究柢，因為哥軍相隔16年再戰世盃，爭勝飢渴感特別強，並有大量同胞fans捧場，猶如主場出擊，加上世盃前獲該國國寶級拉丁歌后夏奇拉「鋪相」打氣，氣勢贏晒。「象國」科特迪瓦「精神領袖」杜奧巴年事已高，狀態未足以應付全場比賽，預料繼續擔任後備殺手，令對手可佔先機。哥倫比亞小讓平半，力捧上盤。

（無綫翡翠台及明珠台、TVB13及TVB19、now 818及840周五凌晨零時直播）

哥倫比亞上仗大炒以防守穩固見稱嘅希臘3比0，可見缺少射手法卡奧，對球隊攻力影響唔大。事實上，呢支南美勁旅近年人才輩出，中前場更有人滿之患，連上季葡超神射手積臣馬天尼斯，以及上季德甲有16球進帳嘅阿祖安拉莫斯，上仗都屈居後備，內部競爭非常激烈，有份落場一定使出渾身解數。

哥國嘅摩納哥中場占士洛迪古斯、費倫天拿快翼古達度個人突破能力強，踢法極具侵略性，等閒之輩真係招架唔住。哥軍仲有「最強第12人」撐場，上仗57,000幾人入場，超過9成係哥倫比亞球迷，場內一片黃海，唔講仲以為佢哋主場比賽，當然要食住個勢，一鼓作氣贏埋今場，奠定出線基礎。
科特迪瓦魔獸老矣

科特迪瓦上仗對日本，大部分時間處於落後，直至杜奧巴上陣先至閃電反超前，可見球隊仍然依賴「魔獸」。不過呢位36歲前鋒身體機能已下滑，領隊林武治亦話佢嘅狀態唔足以應付90分鐘賽事，如非必要，都唔使勞煩佢老人家。不過哥倫比亞球員技術、體能都喺日本之上，如果取得領先優勢，恐怕科特迪瓦就算派杜奧巴上陣，亦難以翻身。

「象國」另一隱憂係中場耶耶托尼近期受傷患困擾，加上上季為曼城搏得太盡，遇上年輕力壯嘅哥倫比亞球員非常輸蝕，隨時要用超技術犯規阻礙對手推進，特別項目耶耶托尼「被罰黃牌」有3.95倍，值得考慮。
哥倫比亞翼鋒古達度

全能邊路殺手，能夠勝任兩邊閘位及翼鋒，技術攻守兼備，上季意甲為費倫天拿攻入11個聯賽入球，古達度鍾意入波後跳舞慶祝，今仗或有機會欣賞佢嘅舞步。
科特迪瓦前鋒韋菲特邦尼

呢位科特迪瓦「新魔獸」上季英超為史雲斯射入17球，甚有杜奧巴影子，佢上仗一記飛頂入網為球隊扳平，盡顯強壯體魄及爆炸力，今場有力再數胡。