東瀛武士團結狩臘

猪拉多纳

生死關頭 槍口對外

今晚輪到C組上演兩場分組賽，其中「東瀛武士」日本再度登場，迎戰2004年歐洲國家盃冠軍希臘，兩隊首仗皆落筆打三更輸波，今仗如果再有閃失就要提早宣布出局。日本上仗嘅表現其實不算差，主要係未能適應科特迪瓦臨場變陣才落敗；相反希臘上仗慘負哥倫比亞予人攻不銳守不穩嘅感覺，今仗面對實力已達歐洲二線水平嘅日本，隨時再輸一仗，阿謙推介「東瀛武士」上盤。（TVB13及19、now 818及840周五早上6時直播）

賽前曾豪言要奪取世界盃的日本，分組賽首仗喺領先下輸畀科特迪瓦，其中「魔獸」杜奧巴後備上陣唔使掂波已經搞到日本後防陣腳大亂，令阿謙印象非常深刻。日本其後更傳出內訌，上仗入波嘅本田圭佑被隊友批評自大遭杯葛，加上主帥沙哲朗尼嘅臨場應變亦被球員質疑，一連串不利消息似乎預示「東瀛武士」今季世界盃之路非常難行。不過，日本係一個非常團結嘅民族，阿謙認為一眾「東瀛武士」為大局着想，會暫時拋開所有不利傳聞，全心全意踢好餘下賽事，力爭分組賽突圍。
希臘攻不銳守不穩

希臘自贏得2004年歐國盃冠軍後，喺國際大賽嘅成績一直浮浮沉沉，球隊畀人感覺係防守還可以，但進攻就認真麻麻，係一支踢「守勢波」嘅球隊。不過，希臘上仗面對哥倫比亞，防守亦出現問題結果連失三球，加上前線仍要倚重年華老去嘅森馬拉斯及基卡斯攻堅，實在難以令人對佢哋有所期待。希臘今仗縱有富咸前鋒美度古或會取代基卡斯正選上陣，但此子之前受傷患困擾狀態平平，今仗上陣亦未必有貨交，面對實力已達歐洲二線水平嘅日本相信難有作為。阿謙認為希臘大有可能繼1994年及去屆世界盃後再一次於分組賽提早「畢業」，日本小讓平半捧上盤。
博香川真司被換出

另外，日本中場主將香川真司狀態一直麻麻，上仗對科特迪瓦亦未能踢足全場，今仗正選上陣如未能交出好表現，隨時會被提早換出，特別項目「被換出」有4.2倍非常值博。