英格蘭爭氣 打殘烏拉圭

猪拉多纳

曾經係職業足球員嘅我好清楚，球場係英雄地，着得件波衫落場，無論係落街場跟隊、定係幫球會上陣，正路嘅冇人會鍾意輸，更何況係代表國家、背負住無數國民希望嘅國家隊球星呢？今晚信我愛隊英格蘭可以喺邊度跌低邊度起番身，輸完畀意大利後，可以贏烏拉圭爭番啖氣，小讓平半同佢死過！（無綫翡翠台、明珠台及TVB13、now818、中央5台周五凌晨3:00直播）
鶴臣換錯人 累輸意大利

唔知大家同唔同意，上場英格蘭雖然輸畀意大利，但如果有睇直播嘅朋友，都應該覺得佢哋表現其實唔差，特別係進攻方面，條利物浦Form發揮得有板有眼，史達寧同格連莊臣喺右邊產生嘅威脅非常大，同時史杜列治、佐敦軒達臣亦有不俗表現，最後1分不保，我反而覺得球員已經盡晒力，實在非戰之罪。

當然輸就係輸，英格蘭亦有不足嘅地方，其中我對領隊鶴臣嘅換人安排好費解，落後要追嘅時候，換韋舒亞入去做乜鬼？換列基林拔入去轟仲直接啦！當然，朗尼完全交唔出水準，亦係英格蘭輸波嘅原因。賽後有好多英格蘭本土同海外球迷，都希望英格蘭唔好再用朗尼打正選，但我覺得佢始終係一把尖刀，一場冇貨交啫，唔等於場場冇，畀多場機會佢，希望佢今場生生性性。
科蘭跌晒Watt

至於烏拉圭，第一場反輸畀哥斯達黎加嘅表現好差，科蘭已經唔係4年前嘅科蘭，另一球星卡雲尼係好波，但踢佢一個曉飛都唔掂啦！係就係今場傳話會用番蘇亞雷斯，但啱啱好番嘅佢，係唔係又真係幫到隊波手？我就真係有保留喇，呢場兩隊邊隊再輸就拜拜，硬撼硬有得保留，我寧願支持愛隊英格蘭，小讓平半算合理，可以一試。