哥倫比亞再做科騷

猪拉多纳

總統+歌星+親屬 組200人最強打氣團

最強應援團Ready，冚家齊撐哥倫比亞！C組次輪分組賽今晚展開，哥倫比亞同科特迪瓦會喺巴西利亞正面交鋒。哥倫比亞上仗大炒希臘技驚四座，其中一個原因係多得屋企人傾力支持，200位家屬總動員會同哥國總統入場打氣，場內就有古亞連刑滿復出，小讓科特迪瓦平半盤點都要撐上盤！

（翡翠台、明珠台、TVB13、now818台及中央5台周五凌晨0:00直播）
古亞連刑滿復出派牌

法卡奧因傷無緣世盃，都唔知幾多人睇死哥倫比亞，估唔到呢支南美球隊咁爭氣，首輪分組賽大炒希臘3:0，將國民嘅疑慮一掃而空。最得人驚嘅，係哥倫比亞鬥希臘場波仲未係最強陣，除咗話國米中場古亞連坐波監之外，去季為波圖喪入29球嘅積臣馬天尼斯都只係做後備，加埋阿祖安拉莫斯呢位射手仲未落場，領隊柏加文大把人使，就算効力西維爾嘅卡路士巴卡因為練波拉傷肌肉要抖10日，隊波嘅火力依然有保證。

家人嘅支持往往係最大動力，哥倫比亞出世嘅格林美得獎歌手Carlos Vives早排負責策劃，加上哥國最大燃油公司Pacific Rubiales拎咗100萬美元（約775萬港元）贊助，請咗全隊哥倫比亞嘅職球員、足足200位屋企人去巴西，仲包埋佢哋嘅食宿同波飛，入場為球員打氣，上仗正正係因為呢班200人應援團傾力支持，哥倫比亞先至贏得咁有霸氣，而且哥國總統桑托斯落實會飛去巴西撐場，咁龐大嘅打氣團做後盾，點可以唔做齣好戲先！
唔同科特迪瓦鬥體能

擁有耶耶托尼同杜奧巴等猛將嘅科特迪瓦，計卡士無疑喺哥倫比亞之上，但「大象」首戰反勝日本2:1場波根本冇說服力，對住日本就話贏身形同體能啫，面對神高神大嘅沙柏達華倫西亞同耶比斯，冇咁易畀你班「大象」兇到嘅！況且哥倫比亞主帥柏加文前日喺哥迪亞出席記者會時話，已經有晒Plan應付科特迪瓦，就係要保持控球在腳，盡量避免鬥體能，咁有部署，梗係信你啦！
Data King：2次決賽周皆小組出局

‧先後2次打入世盃決賽周，皆喺分組賽出局。

‧踢過7場決賽周賽事，錄得3勝1和3負，總共攻入11球，失10球。

‧上場對日本嘅比賽，角球數竟係０個。

‧兩隊冇正式對賽過，今次係第一次交手。
乜都玩錦囊：科特迪瓦擺大頭危

哥倫比亞中前場件件都有數胡能力，就連左右二閘辛尼加同保羅艾美路都係助攻力極強嘅邊路球員，對住擺大個頭、由謝雲奴、沙洛文卡勞同韋菲特邦尼組成嘅科特迪瓦三叉戟，相信肯定大把波入，2.02倍大要捧。
Data King：南美洲失波最少球隊

‧最近10場比賽，取得５勝４和１負佳績。

‧歷屆踢過14場決賽周賽事，錄得4勝2和8負，哥倫比亞總共攻入54球，失57球。

‧曾經4次打入決賽周，只有90年一屆躋身16強，其餘分組賽止步。

‧今屆喺世界盃外圍賽只失13球，係南美洲失球最少球隊。
決賽周數據

哥倫比亞 Vs 科特迪瓦

1 場數 1

3 入球 2

0 失球 1

1 贏 1

0 和 0

0 輸 0