意大利上晒力讓得起

猪拉多纳

「哥」仔未夠料 爆鐵閘防線

意大利上場對英格蘭騷畀我哋睇乜嘢叫做大賽專家，收放自如、從容不迫，完全將急進且後勁不足嘅英軍比下去，今場「藍衣軍團」對住「巨人殺手」哥斯達黎加，哥國對住防守脆弱嘅烏拉圭的確有爆冷嘅可能，但畢竟經驗同實力有限，對住後防穩如上鎖鐵閘嘅意大利，睇怕都冇可能再做多次「巨人殺手」，意大利讓一球有1.87倍，一於捧上盤！

（TVB 13及19、now 818及840周六凌晨零時直播）
變陣強攻哥斯達黎加

英格蘭上場嘅「死因」就係一開始搏得太盡，球員疲於奔命，結果「三獅兵團」變成「抽筋兵團」，下半場莫晒氣，相反意大利深明喺濕熱嘅亞馬遜雨林賽區作賽，保持體力好重要，所以佢哋盡量控球在腳，攞到個波都唔會亂咁掟上前場，成個「一代宗師」咁款，一於睇定嚟打，然後用一至兩招就ＫＯ愈踢愈急躁嘅對手。

對哥斯達黎加賽前，有傳意大利又會變招，採用輪換制嚟應付世盃頻密嘅賽程，基亞連尼上場客串左閘，但呢位中堅守強攻弱，所以今場會將上輪表現出色嘅達美安移去左閘，搵番跑得快嘅阿比迪踢右閘，提升兩閘攻擊力，而基亞連尼會同祖雲達斯隊友邦路斯鎮守中路，至於有輕傷嘅巴沙利同上場因傷缺陣嘅門將保方及後衞迪施基利奧，為穩陣起見都會繼續擺喺後備席，變陣之後嘅「藍衣軍團」不但防守冇削弱到，中前場更注入強攻本錢，今場為攞3分提早鎖定出線資格，面對實力次一級嘅對手，意軍踢法更加進取亦好合理！
撐弗爆巴神先發入波

面對咁穩陣嘅意大利，哥斯達黎加真係冇乜勝算，一來哥軍踢開穩守突擊，對住主攻、但防守力弱嘅烏拉圭就話可以爆冷取勝，但對住防守力強嘅意軍，單靠快速突破作用不大，上場嘅英軍已經證明咗呢樣嘢；二來意大利中場有「罰球專家」派路、遠射能手馬治斯奧同突破力強嘅簡達華，相信要撕破哥軍防線並唔難，再加上有狀態大勇嘅巴洛迪利喺前線撞散對手，意大利上盤認真搏得過，另外亦可博埋「巴神」今場先發事件係取得入球。
MARK實佢：哥斯達黎加前鋒 拜仁雷斯

雖然喺英超發展鬱鬱不得志，但哥軍陣中以佢名氣最響亮，喺前鋒線上佢嘅球感同位置感都一流，頭槌尤其出色，今仗佢會因應球隊主守戰術稍為墮後，等待機會向突襲意大利防線。
MARK實佢：哥斯達黎加前鋒 祖爾甘保

因首席射手沙保里奧斷腳緣盡世盃，哥軍就要靠呢個21歲小將食胡，結果佢不負所望，上場交出一入球一助攻成為「殺圭英雄」，更被選為該仗最佳球員，來季好有機會被阿仙奴回收。
MARK實佢：意大利中場 簡達華

上仗佢玩殘英格蘭條防線，右路多次個人突破，並助攻巴洛迪利頂入致勝球，佢唔單止可以踢邊路，能夠勝任中場多個位置，仲可以喺中場組織策劃，又擅長後上攻門，堪稱全能戰士。
20年前曾一戰意軍小勝

雙方只曾於1994年世盃前嘅熱身賽碰頭一次咁大把，當年意大利憑「神奇小馬尾」巴治奧於中路突破，連過幾關後妙傳前鋒薛洛尼建功，以1比0小勝哥斯達黎加，不過意軍近3次喺世盃分組賽對住墨西哥、美國等中北美洲球隊，咁啱全部都踢成1比1，唔通今仗對哥斯達黎加又會陷於苦戰？
奧斯紅牌殺手作風狠辣

國籍：智利　

年齡：39

曾執法大賽：2011美洲國家盃、南美自由盃、南美球會盃

簡介：呢位智利球證向來有「紅牌殺手」之稱，佢奉行嚴刑執法，派牌絕不手軟，05年試過於16場聯賽，趕咗21位球員出場。其實呢位辣手判官，已經喺今屆C組分組賽科特迪瓦對日本登場，雖然冇人領紅，但該場有4名球員食咗黃牌，保持兇狠作風，希望佢今仗鬆手少少啦！

執法場數：81

黃牌數：377

紅牌數：20

判12碼：19

平均黃牌數：4.65

平均紅牌數：0.24

平均判12碼次數：0.23
科娜推介：意大利上盤