未來槍手預演入球騷

猪拉多纳

意大利哥斯達黎加交「鋒」

今晚又到「死亡D組」上演次輪分組賽事，哥斯達黎加上仗爆出今屆世盃首個大冷門，以3:1擊敗南美勁旅烏拉圭，贏波功臣之一係由阿仙奴外借到奧林比亞高斯嘅21歲新星前鋒祖爾甘保，今晚佢率領哥斯達黎加挑戰意大利，適逢「藍衫軍」王牌巴洛迪利亦盛傳係「兵工廠」目標，兩大「未來槍手」正面交鋒，入波唔慌少，一於捧1.92倍入球大。

（TVB13、now818台及中央5台周六凌晨0:00直播）

賽前外界一致睇死哥斯達黎加係D組嘅墊底穩膽，但估唔到佢哋首輪對住上屆「四哥」烏拉圭，竟然反敗為勝，仲要3分鐘內連入2粒，搞到「死亡D組」嘅競爭比想像中Open。
祖爾甘保有本事入波

由「兵工廠」外借到奧林比亞高斯嘅21歲前鋒祖爾甘保表現搶眼，有入波又有助攻，我身邊唔少阿仙奴球迷，都希望領隊雲格快快手收番佢嚟自己用，今晚對住意大利，相信呢位後生仔絕對唔會腳仔軟，搏命幫國家隊爭勝之餘，順便證明自己嘅實力。有祖爾甘保喺度，哥斯達黎加今晚有波入絕對唔奇。
巴洛迪利體能弗爆

對手意大利上場2:1搞掂英格蘭，為球隊射入奠勝球嘅「巴神」巴洛迪利，賽後當選比賽最佳球員。其實睇番場波，好多英格蘭球員都頂唔住30度高溫，唔係抽筋就已經跑唔郁，連意軍嘅馬治斯奧都話熱到暈暈哋，但睇見巴洛迪利成場波仲可以體能Fit爆周圍走，證明「巴神」個朵的確唔係流，難怪一直有傳「兵工廠」想打佢主意搵佢過檔，今晚兩大阿仙奴未來射手交鋒，隨時上演一場「入球騷」，捧入球大夠晒穩陣啦！
阿仙奴Target：巴洛迪利

今屆決賽周

上陣時間︰73分鐘

入球︰1球

射門︰3次

跑動距離︰7.59公里
兵工廠Target：祖爾甘保

今屆決賽周

上陣時間︰90分鐘

入球︰1球

射門︰4次

跑動距離︰8.77公里
Data King：意大利傳波成功率9成

‧意大利上場對英格蘭傳波成功率達89%，成功控制中場。

‧喺世盃外圍賽B組，取得6勝4和成績，連同上場分組賽世盃賽事11場不敗。

‧踢過82場決賽周，錄得46勝21和15負，攻入130球，失76球。

‧近2屆決賽周6場分組賽取得2勝3和1負。
Data King：哥斯達黎加近10戰5負

‧哥斯達黎加近10場成績只得3勝2和5負。

‧以往與意大利只曾一次碰頭，喺94年中立場0:1輸畀意大利。

‧踢過11場決賽周，錄得4勝1和6負，攻入15球，失22球。

‧喺02年同06年6場分組賽，錄得1勝1和4負。
乜都玩錦囊：哥斯「龜殼」硬淨博半和

哥斯達黎加首仗以機動戰術打殘烏拉圭，贏盡各界掌聲。相信佢哋第2場對住意大利，都會繼續穩打穩紮。意大利要打破哥軍「龜殼」絕對唔易，2.08倍嘅半場和筍到爆，博得過。