「保特」Show Time厄瓜多爾開洪盤

猪拉多纳

訴心聲大會振士氣

聽朝世盃E組洪都拉斯對厄瓜多爾，雖然兩隊上仗同樣輸波，但應對心態大不同！厄瓜多爾為提升士氣，特別開咗個「訴心聲大會」齊齊傾吓今場點樣改進，全軍戰意即時提升；反觀洪都拉斯就連自己球迷都洩晒氣，對住有「球壇保特」路爾斯華倫西亞領軍嘅厄瓜多爾，受讓半一都咪掂，今場捧上盤啦！

（TVB13、now818台及中央5台周六早上6:00直播）

厄瓜多爾喺首輪分組賽對瑞士攻勢一浪接一浪，但去到補時階段先輸波，相信只係一時鬆懈啫！佢哋為咗提升士氣，特別喺落敗後翌日「集體訴心聲」，開操前搭住膊頭圍圈檢討，據門將阿歷山大杜明基斯講，球隊都已經走出上仗輸波嘅陰霾，仲肯定唔會重犯上仗鬥瑞士嘅錯，睇嚟士氣好唔錯啵！
厄瓜多爾練波開檢討會

厄軍王牌路爾斯華倫西亞嘅國家隊首演，正係大約10年前一場熱身賽對洪都拉斯，當時兩軍只賽和1:1，但華倫西亞已經今時唔同往日，相信呢位被譽為「球壇保特」嘅快翼必帶領上仗同樣有波入嘅安拿華倫西亞，同埋慘被指為輸波罪人嘅米高阿羅約，齊齊做番齣好戲畀球迷睇，好易開到紅盤。
洪都拉斯柏拉西奧斯停賽

洪都拉斯尋日去到哥列迪巴嘅酒店嗰陣，門外迎接佢哋嘅球迷得小貓三四隻，呢班「洪粉」仲要個個苦口苦面一啲都唔似見到偶像咁，好似預咗國家隊好快就要執包袱返歸咁。本來洪都拉斯嘅實力已經唔及對手，家陣連自己球迷都唔撐，鬥心好極有限啦！最勁嗰位柏拉西奧斯仲因為上場兩黃一紅被逐，今仗要停賽，實力再削弱，睇怕又要輸鑊甘喇！
Data King：洪都拉斯近10戰2勝

‧洪都拉斯近10場比賽，取得2勝4和4負。

‧近10次對厄瓜多爾有6場打和，其餘為2勝2負。

‧曾2次打入決賽周，但都係分組賽畢業。

‧踢過7場世盃決賽周，錄得3和4負成績，攻入2球失9球。
Data King：近8次交手勁旺半細

‧厄瓜多爾近10場比賽取得2勝5和3負。

‧踢過8場決賽周，錄得3勝5負，總共攻入8球，失10球。

‧近8場對洪都拉斯，7場開出半場細。

‧曾2次打入決賽周，最佳成績為16強。
乜都玩錦囊：洪都拉斯穿窿做大騷

洪都拉斯防線僅得侯城守將美羅費古羅亞比較似樣，不過有佢壓陣又點吖，拍檔唔掂早排就算對住較弱嘅以色列都勁失4粒，加上厄瓜多爾士氣如虹，隨時炒起佢哋做番場入球騷，1.82倍入球大抵捧。