波斯尼亞雙箭搶W

猪拉多纳

伊比斯域正選砌超霸鷹

F組次輪賽事，「超霸鷹」尼日利亞將喺庫亞巴迎戰「世盃新丁」波斯尼亞。尼日利亞上仗面對全組最弱嘅伊朗都搵唔到破門方法，今仗面對波斯尼亞相信更難入波。波斯尼亞上仗雖不敵阿根廷但表現對辦，今仗更會改變戰術踢得更進取，有望擊敗「超霸鷹」取得世界盃首勝，阿謙今仗捧波斯尼亞贏波。

（TVB 13及19、now 818及840周日早上6時直播）

尼日利亞上仗慘遭弱旅伊朗摸和痛失兩分，球隊全場雖狂攻對手但一球都入唔到，可見前線主將如域陀摩西斯、艾曼紐艾文歷基、阿密特穆沙，甚至後備上陣嘅奧丹維治和艾美奧比，埋門質素皆屬「有限公司」，今仗要攻破波斯尼亞大門實屬不易。尼日利亞北部城市日前發生爆炸事件，造成多名睇緊世界盃嘅球迷身亡和受傷，呢個消息令尼日利亞上下感到震驚和痛心，球員雖表示會竭盡全力爭取勝利以告慰死傷者，但心情難免會受到影響，今仗未必能交到貨。
變陣442強攻尼日利亞

波斯尼亞呢位世界盃新丁上仗面對奪標熱門之一嘅阿根廷雖然輸波，但表現其實毫不失禮，只係因一記烏龍球及美斯的個人表演才落敗。由對阿根廷場波所見，波斯尼亞前鋒迪斯高只得自己一人攻堅時，顯得有點孤掌難鳴，到下半場中段換入伊比斯域後才發揮威力，結果成功喺對手身上取得入球。

波斯尼亞主帥蘇錫近日亦「放風」表示會改踢442陣式，預示伊比斯域將會正選上陣，配合迪斯高及中場發電機米斯莫域，相信可對「超霸鷹」帶來極大威脅，今仗有望擊敗尼日利亞取得首場世界盃勝利，阿謙捧波斯尼亞贏波。

另外，波斯尼亞前鋒迪斯高上仗對阿根廷未有「士哥」，今仗面對「超霸鷹」相信會更積極爭取入球，尼日利亞防線相信未必頂得住佢，不妨投X迪斯高特別項目「入球」。
波斯尼亞 對非洲兵有一手

此前兩隊從未交過手，波斯尼亞更加係第一屆出席世界盃決賽周，佢哋過去四年曾經四次同非洲球隊踢熱身賽，取得三勝一負，包括上月尾以2比1擊敗另一支決賽周分子科特迪瓦。尼日利亞過去兩次參加世界盃分組賽（02、10年）都係分別錄得一和兩負出局。
奧拉利升呢首擔大旗：奧拉利 Peter O'Leary

國籍：新西蘭

年齡：42

曾執法大賽：07世青盃、09世青盃、08世冠盃、09世冠盃、10世界盃

簡介：正職係中學生物科教師嘅奧拉利已經有20年執法經驗，曾主吹兩屆世青盃，以其老師身份，正好駕輕就熟地訓導一班後輩。奧拉利有份出席上屆世界盃決賽周，但多數擔任第四旁證，欠缺發揮機會。今仗係佢今屆第一次擔正主吹。

執法場數：42

黃牌數：154

紅牌數：8

判12碼：8

平均黃牌：3.66

平均紅牌數：0.19

平均判12碼次數：0.19
美斯謙推介：波斯尼亞勝