亞洲球隊完全唔夠打

猪拉多纳

亞洲球隊今屆決賽周成績令人失望，踢落似乎完全唔夠打，就好似昨晨嗰場日本對希臘咁，日本打多對手一個都係老鼠拉龜，呢場大戶賽前都係睇好下盤，去到希臘有球員被趕出場，大戶走地直頭玩埋細盤，睇死日本贏唔到。日本喺亞洲嚟講已經係數一數二嘅頂級球隊，對住呢支歐洲二、三線嘅希臘都冇料到，嚟緊都唔好再對亞洲球隊有太大期望。

聽晚另一支亞洲代表南韓於H組出場，面對非洲球隊阿爾及利亞。南韓近年球員名氣、實力都比唔上日本，佢哋首場雖然打和俄羅斯，但表現只係一般，反而阿爾及利亞上場對比利時輸波贏盤，踢落虎虎生威，南韓今仗讓唔起對手，揀下盤。
葡萄牙今場見真章

另一場G組葡萄牙對美國，葡萄牙上場大敗除咗因為踢少一個，德國實力喺呢組大超班亦係原因，呢場對手換咗低兩班嘅美國，葡萄牙係時候嚟料，讓半一盤口合理，捧上盤啱數。