亞洲代表恐步98後塵

猪拉多纳

情緒高漲睇愛隊敗興而回

尋日凌晨3點同清晨6點嘅錄影廠，係咁多日直播以嚟最熱鬧嘅一日，幕後同事排排坐睇住英格蘭同日本呢兩場比賽，可想而知，呢兩隊粉絲滿天下，可惜完場後捧場客個個垂頭喪氣，皆因兩隊波都唔爭氣，話佢哋仲有渺茫出線希望只不過係數字上嘅遊戲！

呢次係近四屆世界盃以嚟，亞洲球隊首輪分組賽表現最差嘅一次，對上一次亞洲球隊喺首輪贏唔到波已經係1998年，結果當時嘅沙特、南韓、伊朗、日本喺分組賽齊齊玩完。依家已經有澳洲率先訂定機票走人，日本兩場得一分亦唔樂觀，南韓同伊朗嘅表現冇乜說服力，唔通今次舊事重演，亞洲冇隊可以晉級16強？

日本人多踢人少圍攻希臘，點知攻極都唔入，情況同之前輸畀科特迪瓦有啲相似，統計數據佔盡上風，但係冇入波板斧，雖然日本出征巴西前號稱球星雲集，不過面對歐非二流球隊都仲係踢得好辛苦。日本球迷要面對現實，呢班喺歐洲球會搵食嘅球員仲未去到巨星級，踢波風格亦都缺乏創造性，加上正如Peter所講，身材又輸蝕畀希臘，結果踢多個人都冇着數！
評述都要有風格創造性

講到風格同創造性，評述同踢波一樣都容易引起爭議性，呢排收到好多寶貴意見關於我同Peter，仲有何輝嘅評述風格，無論係正面嘅讚賞定負面嘅批評，我都非常重視，因為講波係直接面向社會大眾，一定要將各位球迷同觀眾嘅感受擺喺第一位，我同Peter發揮無綫精神：全力以赴、做到最好！