德國無鋒起浪 捲走低班黑星

猪拉多纳

德國喺G組首戰排出「無鋒陣」大炒葡萄牙，但就贏得太輕鬆未受考驗，今晚佢哋對住加納，「黑星」首戰輸波呢場必搏到盡。不過德國整體實力始終高幾班，今場就算讓1.5/2球，我都信德國大勝而歸，捧上盤兼提早出線。

（TVB13、now818台及中央5台周日凌晨3:00直播）

雖然「日耳曼兵團」第一場數葡萄牙4蛋係踢得好，但贏得咁輕鬆要多得對手自毀長城，德國多打一人先踢得咁輕鬆。但佢哋今晚對住加納，絕對唔可以輕敵，皆因「黑星」首戰對美國「臨天光瀨尿」輸波，今場為免出局一定傾巢而出，以體力化踢法壓迫德國，唔畀佢哋踢得好似首戰咁順。不過德國踢法節奏夠快，唔似出咗局嘅西班牙咁「歎慢板」，而且班球員相當有默契，絕對唔怕加納壓前。
曉姆斯大腿受傷難披甲

德國今場應該都會用番上場嘅「無鋒陣」，人腳唔會大變，唯獨係後防重心之一曉姆斯上場大腿受傷，今戰極可能唔出得，要謝路美保定移返入中路，又或者用梅斯達菲頂替，但呢啲些微變動相信影響唔大。
奇雲保定孭飛加納第一屏障

至於今戰唔輸得嘅加納，應該會擺出最強陣容，出番上場後備上陣嘅奇雲保定。呢位中場出名活力充沛，踢法硬朗，今戰出場最大作用係要破壞「日耳曼兵團」嘅中場線。不過正所謂「雙拳難敵四手」，佢一個人點夠實力平均嘅德國中場鬥，就算佢可以滿場飛，都好難頂得住打整體戰嘅德國隊。

況且加納後防喺對美國一戰，已經睇得出唔多穩陣，後防球員比賽時成日走漏人，德國無論喺個人技術同整體都比佢哋高幾班，就算要讓到1.5/2球，我都撐呢個上盤。
Data King：上場傳球成功率8成

‧德國近10場比賽，取得7勝3和不敗佳績。

‧上場對葡萄牙傳球成功率為82%，32強中排第5。

‧踢過100場世盃決賽周，錄得61勝19和20負，攻入210球，失117球。

‧前鋒湯馬士梅拿首戰攻入3球，成有史以來第49次做出帽子戲法。
Data King：2次交手輸波收場

‧加納近10仗取得4勝3和3負。

‧首戰對美國係32強中，攻門最多嘅一隊，共21次。

‧踢過10場世盃決賽周，錄得4勝2和4負，攻入10球失12球。

‧歷來曾2次對德國，2戰皆北。
乜都玩錦囊：德國圍攻吼角球大

德國上場對手葡萄牙半場自爆，德軍未展示真正實力，今戰對住加納，對手為免提早「收工」必搏命頂住德國攻勢。德國圍攻可能會出現大量角球，角球中位數10.5球，1.95倍嘅角球大好抵玩。