波斯尼亞 省爆超霸鷹

猪拉多纳

伊比斯域 迪斯高擔正

凡事都有第1次，繼上仗鬥阿根廷攻入國家史上首個世盃決賽周「士哥」後，波斯尼亞今晚喺F組次輪分組賽對尼日利亞，將會力爭締造國家史上首場世盃決賽周勝仗。領隊蘇錫講明擺大個頭搵伊比斯域拍迪斯高攻堅，對住爆出內訌一鑊粥嘅「超霸鷹」，梗係直取1.9倍客W啦！

（TVB13及now818台、中央5台周日早上6:00直播）

作為前南斯拉夫分裂國嘅波斯尼亞，話就話係決賽周「新丁」，但首戰表現並唔失禮，對住爭標熱門之一嘅阿根廷踢得有板有眼，如果唔係守將哥拉辛拿斯晨早擺老烏，呢場波真係未必使輸。最惡啃嗰隊阿根廷都已經捱過，剩餘兩仗對手只係尼日利亞同伊朗，波斯尼亞要爭出線依然好大機會，領隊蘇錫決定進取啲，賽前話會踢442，搵上仗後備入替即有「士哥」嘅伊比斯域擔正，夥拍迪斯高合組雙箭頭，夠晒爭勝意欲。
波軍沙利荷域因傷缺陣

陣中攻擊好手沙利荷域小腿有傷無緣披甲，大軍前日練波嗰陣，中堅史柏希斯一度因左膝受傷，要隊友扶出場接受治療，但據波斯尼亞軍醫所講，呢位33歲隊長冇乜大礙，今仗會繼續落場搏殺，有前又有後，捧場客絕對唔使擔心。

對家尼日利亞首戰只能同伊朗互交白卷，賽後被問到如果連伊朗都贏唔到，點砌得低波斯尼亞同阿根廷嗰陣，領隊基舒即時躁咗，仲反問記者：「波斯尼亞同阿根廷大晒呀？」邊有一隊波係大晒吖，但亨格比利就覺得，「超霸鷹」冇本錢鍊得贏波斯尼亞囉！
尼日利亞爆內訌 領隊亂晒坑

話說基舒前日發晒火，炮轟中場拉蒙阿施斯同前鋒奧丹維治冇執行佢嘅戰術指令，所以決定棄用呢兩位中前場球員，但隨住大軍守將奧保亞邦拿、奧美魯奧、中場魯賓加比爾同前鋒阿密特穆沙都因傷好大機會缺陣後，艾美奧比又公開質疑基舒嘅排陣，呢位領隊焗住轉口風，又話會用番奧丹維治擔正，內訌不和到出面，人腳士氣又唔掂，點頂得住波斯尼亞呀？
Data King：尼日利亞分組賽例衰

‧尼日利亞近10場比賽，取得3勝6和1負。

‧近8戰有6場開和波。

‧踢過15場世盃決賽周賽事，錄4勝3和8負，攻入17球，失21球。

‧02年、10年共6場世盃分組賽未贏過，錄得2和4負。
Data King：波斯尼亞旺開半場細

‧波斯尼亞近10戰取得5勝5負。

‧近8戰7場皆開半場細。

‧守將哥拉辛拿斯，上場對阿根廷，「創造」史上最快烏龍球，時間為開賽後2分08秒。

‧前鋒迪斯高係世盃外圍賽歐洲區次席射手，共攻入8球。
乜都玩錦囊：博波斯尼亞半勝

迪斯高同伊比斯域一個射得，一個衝得，加埋有比真歷從後支援，對住今仗由過氣中堅尤保率領嘅尼日尼亞防線，肯定大把機會數胡，半場應該已經可以取得領先優勢，波斯尼亞半場客勝有2.55倍，值博。