美國受讓唔赦葡萄牙

猪拉多纳

天殘地缺 保羅賓圖頭都 「大」埋

世盃G組次輪分組賽，美國於馬瑙斯亞馬遜球場出戰葡萄牙，葡萄牙首戰慘遭德國坦克輾爆，除淨吞4蛋外，更受到嚴重傷停問題困擾，今仗最少有5名主力無法上陣，整條正選防線只餘下右閘荷奧彭利拿一人可以繼續上陣，即使有基斯坦奴朗拿度克服傷患領軍，亦難有把握贏波及保持不失，美國受讓半一非常着數，雙選下盤同入球大。

（TVB 13及19、now818及840周一早上6時直播）

葡萄牙首輪被德國技術性擊倒，最慘係賠了夫人又折兵，効力皇馬嘅兩名主力守將，左閘法比奧干查奧重傷緣盡世盃，中堅比比鹵莾頭撞湯馬士梅拿領紅，今仗停賽。
傷疲C朗難做救世主

另一中堅費倫巴治嘅般奴艾維斯亦左大腿筋受傷，連門將魯爾柏迪斯奧都傷埋，防線5大主力得番右閘荷奧彭利拿一個可以繼續上陣，今晚被迫大執位，頂上嘅雙中堅列卡度哥斯達今季喺華倫西亞表現令人失望，路爾斯尼圖去年至入選經驗有限，左閘更加要防中米基爾維洛素客串，間接影響埋中場防守力，前線曉高艾美達又傷埋並已經返國治療，球隊陣容真係天殘地缺。

葡軍上仗對德國亦踢得好唔聰明，球隊半場已打少個並落後3粒，根本大勢已去，但領隊保羅賓圖都冇因為咁而為今仗保留實力，畀紮住上陣嘅C朗捱足全場，令佢傷勢惡化，雖然最後時刻可以復操，但肯定冇足夠狀態，今晚好難旨意做「救世主」。葡軍上仗喺適應天氣方面亦出現問題，多名主力末段無以為繼，今晚去到天氣更熱嘅亞馬遜球場作賽，呢支殘兵肯定更加難捱。
奇哥催谷士氣有一手

美國喺呢組原本被睇淡，但上仗於劣勢下顯示頑強鬥志，最終絕殺加納全取3分，士氣大振，領隊奇連士文鼓勵士氣確有一手，今晚乘勝追擊葡萄牙殘兵，有權偷雞，雖然主力射手艾迪杜里上仗傷出今要倦勤，不過副選嘅雲度路斯基喺之前嘅熱身賽對南韓同墨西哥都表現出色，今晚由佢頂替艾迪杜里，球隊鋒力並無太大削弱，面對後防大穿窿又要焗攻嘅葡萄牙，美國入波機會甚高，下盤同大都值得一博。
MARK實佢：美國隊長 丹普西

美國首仗擊敗非洲雄師加納，隊長丹普西開賽早段已為球隊打開紀錄，喺當路雲落選後，丹普西正式擔任美國隊大佬，所以即使佢上仗撞傷鼻骨，今晚都要頂硬上，隨時要戴住保護面罩出戰。
MARK實佢：葡萄牙翼鋒 拿尼

今季喺曼聯無甚表現嘅拿尼，今次代表葡軍出征亦一路低調，不過球隊上仗對德國遭遇潰敗，全隊球員都踢得差，惟獨拿尼喺邊線表現活躍，對德國防線構成一定威脅，算係葡軍唯一亮點。
02分組賽對決美國曾爆大冷

雙方最近一次對壘已經係12年前日韓世界盃分組賽，當年首輪賽事，美國爆冷以3比2擊敗有費高、雷哥斯達及現任領隊保羅賓圖壓陣嘅葡萄牙。其後美國亦以1分之微力壓葡萄牙，以小組次名出線。
畢坦拿體育阿Sir踢得兩腳

國籍：阿根廷　

年齡：39

曾執法大賽：13世少盃

簡介：畢坦拿今屆曾主吹H組分組賽俄羅斯對南韓，該仗向雙方總共出示咗4張黃牌，最終打和1比1。剛於上周度過39歲生日嘅畢坦拿運動員出身，自小已加入多間球會踢波，之後棄足用手打籃球。佢曾於01至04年間報讀體育教師班，現時於中學教體育。畢坦拿2010年成為國際球證，短短幾年內極速上位，已成南美頂級名哨，今次世盃係佢真正嘅考牌大賽。

執法場數：40

黃牌數：195

紅牌數：9

判12碼：7

平均黃牌：4.88

平均紅牌數：0.23

平均判12碼次數：0.18
蘇斯黑柴推介：美國下盤/大