深刻畫面轉眼就唔記得

猪拉多纳

今屆世盃已經踢到次輪分組賽，唔知畀到大家最深印象嘅係邊件事呢？喺乜都求新求快資訊爆炸嘅現代社會，我哋只要拎起部智能手機，就可接收數之不盡嘅訊息，任何軍情、邊個上位一切都盡在掌握。好似日前力拒巴西狂轟猛炸嘅墨西哥門將奧祖亞，賽後唔單止被網民極速起底，甚麼「六指門神」及神級改圖相繼出現，令呢位原本寂寂無聞嘅失業漢極速爆紅。

作為老一輩球迷，斯維對一啲昔日經典場面，例如86年馬納當拿對英格蘭連過數關嘅超級金球、88年雲巴士頓零角度士哥等，仍然津津樂道。舊事物記得一清二楚，反而問番你近年有咩金球，可能大家都要認真諗吓，依家英超、西甲、歐聯、世盃未停過，過去一季各大聯賽都產生咗唔少金球，就算日前卡希爾嘅凌空抽射亦妙到毫顛，但喺資訊不斷轟炸底下，你好快就會因下一個世界波而忘記「袋鼠拳王」呢球。仲有一點，大家又有冇發覺近屆世盃冇乜爆出超新星？因為在互聯網下已經冇晒秘密，又何來你唔認識嘅驚喜新星呢？