南韓撲擊阿爾及利亞

猪拉多纳

孫藝珍率星級應援團現場打氣

南韓獲第12人打氣，誓取三分以謝星級球迷！南韓對阿爾及利亞嘅H組賽事，星級打氣團孫藝珍、劉在石及丁一宇等韓星，將親臨阿萊格里港河岸球場為國家隊打氣，再加上球隊大廚專登整泡菜湯及烤牛肉幫球員補充體力，面對非洲球隊阿爾及利亞，首戰只取得一分嘅「太極虎」必抖擻精神，以勝利答謝支持者，南韓小讓平半撐上盤。

（TVB 13及19、now 818及840周一凌晨3時直播）

南韓首仗領先一球下，被俄羅斯追和只得一分，其實場波大家都未入局，而且實力相若，各得一分戰果合理。不過，嗰場波就出現咗平時比較罕見嘅情況，南韓有三名球員包括後衞洪正好，竟然踢踢吓抽筋，可見巴西炎熱氣候幾咁難頂，今場對住有「沙漠之狐」稱號嘅阿爾及利亞，一定要搞掂體力同佢鍊過。
韓軍廚神煮好嘢充電

好彩，南韓有個隨軍星級大廚，佢跟開球隊周遊列國打大賽，習慣喺比賽後都會煮好嘢畀球員，等佢哋食完補充能量外，亦對心情有改善，包括思鄉之情。今次踢完俄羅斯後，大廚就煲咗一大煲泡菜湯，仲加料放多啲豬肉，另外仲有南韓人最鍾意嘅烤牛肉，喺咁悉心照料下，球員體力補充得快。

唔止備戰有大廚撐，今場「太極虎」場內都有星級粉絲撐，韓星劉在石率領《無限挑戰》打氣團，今日入場為南韓打氣，打氣團成員有孫藝珍、丁一宇、HAHA及男團B1A4成員BARO，加埋原本入場嘅南韓fans，絕對聲勢浩大，呢個「第12人」絕對嚇得吓。
「沙漠之狐」攻力有限

至於阿爾及利亞方面，球隊上仗雖然以1比2不敵比利時，但能夠取得1986年以嚟首個決賽周入球叫做有個安慰獎，今屆肯定唔使做「三零部隊」，但其實呢個入波係12碼，阿爾及利亞喺正式射門到依家都未造成入球，攻力都只係有限公司，面對矢志要全取三分嘅南韓未必夠打，南韓上盤可取。另外，兩軍都以地面推進較多，較少落底出波，角球亦唔多，今場可捧埋角球細。
MARK實佢：南韓中場 李青龍

波底好，速度快，邊路推進具威脅，可以為隊友製造機會，亦可移入中路自己搵食，於英格蘭効力幾年後，身體質素亦改善不少。
MARK實佢：阿爾及利亞中場 賓達納

今年二月選擇放棄代表法國，呢名熱刺中場雖然只得19歲，但下半季喺熱刺極速成熟，助攻助守，擁有高大身材之餘，傳送技術亦獨到。
南韓對非洲例必大爆發

兩隊上次交手已經係30年前，當時南韓淨勝阿爾及利亞兩球。不過睇番南韓近10次國際賽對住非洲球隊，錄得6勝1和3負，表現尚算不俗，而賽果亦偏向多入球，以中位數2.5球計，10仗中有6次開出入球大。
魯爾丹應屆「黃牌」球證

魯爾丹 Wilmar Roldan

國籍：哥倫比亞　

年齡：34

曾執法大賽：11美洲國家盃、12奧運

簡介：魯爾丹23歲開始球證生涯，08年成為國際球證，曾參與11年美洲國家盃，只係主吹兩場分組賽及季軍戰，經驗略遜。魯爾丹今屆曾執法A組墨西哥對喀麥隆一仗，另外佢暫時係今屆世盃咁多位球證中，執法國際賽生涯中平均派黃派最多嘅球證。

執法場數：74

黃牌數：383

紅牌數：40

判12碼：27

平均黃牌：5.18

平均紅牌數：0.54

平均判12碼次數：0.36
渡邊年推介：南韓（上盤）