俄羅斯超水皮難逃魔爪

猪拉多纳

比利時搶W爭出線！世盃H組次輪賽事，「歐洲紅魔」今晚強戰俄羅斯，我認為比利時贏面好高。有睇首輪分組賽嘅球迷，都見到俄羅斯班波係幾咁曳，攻不銳時守不穩，雖然比利時都唔係咩一流貨色，但起碼鬥心爆棚，人腳質素亦比對手高幾班，「紅魔」讓球盤小讓平半，捧1.73倍上盤！

（TVB13及now818台、中央5台周一凌晨0:00直播）

早幾日我都同大家分析過，比利時班波雖然係星光熠熠，但並非想像中咁勁，結果佢哋首戰果然只能險勝阿爾及利亞，贏波輸盤。事隔幾日，點解我又會掉轉槍頭，撐番「歐洲紅魔」呢？原因好簡單，就係佢哋今戰對手俄羅斯實在太水皮喇！
速度活力欠奉 門將錯漏百出

首輪分組賽俄羅斯鬥南韓一仗，可以話係今屆世盃其中一場水準極低嘅賽事，兩軍成場波都只係喺外圍搓嚟搓去，踢法迂迴，南韓我唔怪佢哋，但俄羅斯掛名都叫做東歐勁旅，可惜踢出嚟嘅波仲衰過南韓，以古沙哥夫、施哥夫為首嘅中場線，連逼搶都要輸畀「太極虎」，由31歲射手基沙哥夫孭飛嘅鋒線就仲衰，活力又冇、速度又冇，對住身形矮細嘅南韓球員，尚且勉強搵到些少甜頭，但今戰對手換上高柏尼、雲拜頓等大舊佬，憑咩搵食呀？

講到最恐怖嘅，都係俄羅斯條防線，門將艾堅菲夫甩漏多多，之前已經有「屙蛋」前科，估唔到嚟到世盃，呢位牛油手門神又出事，將李根鎬嘅射門「活生生」咁拍入網，信心同狀態都冇晒，點靠得住呀？

相反，比利時首戰表現的確係令唔少人失望，但係我收貨喎，之前都講過啦，我一向認為比利時名大於實，結果亦一如所料，不過佢哋都有樣嘢係我意想不到嘅，就係「紅魔」陣中班英超巨星雖然上晒位，不過表現出嚟嘅拚勁鬥志，仲堅過未成名嘅阿爾及利亞，論三線實力，比利時更加係贏以本土聯賽球員為骨幹嘅俄羅斯幾條街，難得呢場波「紅魔」只係小讓平半，梗係捧上盤啦！
Data King：上場成功傳球率高達82%

‧90年後曾經對賽俄羅斯3次，成績為2勝1和。

‧上場成功傳球率為82%，中場控制取得絕對優勢。

‧對上一次晉級淘汰賽喺2002年，最佳成績為16強。

‧近10場比賽，取得6勝2和2負。
Data King：上次入16強追溯到86年

‧23名球員大軍，全部都係効力俄羅斯本土球會。

‧對上一次晉級淘汰賽階段，已經係1986年嘅事。

‧踢過38場世盃決賽周，錄得17勝7和14負，攻入65球，失45球。

‧俄羅斯近10場比賽，取得6勝4和不敗成績。
雙方得個樣虛張聲細

比利時上場雖然贏波，但係鑽石陣容只係「雷聲大，雨點小」，半場圍攻阿爾及利亞攻極都攻唔入。至於俄羅斯上一場都係「濕水炮仗」，今次兩隊碰頭，應該唔會出現大手交易嘅情況，1.62倍嘅入球細撐得過。