高速太極虎 追咬沙漠之狐

猪拉多纳

南韓今晚喺H組次輪賽事鬥阿爾及利亞，小妹有信心「太極虎」可以全取3分！南韓上仗對俄羅斯表現可人，一班球員當然充滿信心啦，佢哋更為今仗整咗個速度特訓，務求繼續用突擊戰術搞掂對手；反觀阿爾及利亞上仗對住表現唔掂嘅比利時，全場居然僅得3次射門，鋒力疲弱，南韓小讓平半，捧1.92倍上盤。

（TVB13及now818台、中央5台周一凌晨3:00直播）
南韓速度特訓實行以快打快

南韓首戰對俄羅斯執得1分，但其實班波表現唔曳，無論控球率同傳球次數都優於對手，池東沅話嗰場賽事嘅最大得着，就係令全隊重獲自信：「之前喺熱身賽對加納大敗嘅陰影已經冇晒，更衣室氣氛改善咗好多，我哋嘅信心已經返晒嚟喇！」南韓職員都爆料，話上仗後備入替嘅李根鎬取得入球變英雄，全南韓都將佢當做神咁拜，嚟到今仗賽前，「太極虎」仲獲一眾靚女藝人鋪相打氣，大叫「Oppa Fighting！」搞到班球員個個心雄，全隊戰意都鬼咁旺盛添！

有自信當然對表現有好大幫助啦，不過都要有啱用嘅戰術先得嘅！南韓主帥洪明甫就話「沙漠之狐」阿爾及利亞嘅最大優勢係速度，所以「太極虎」近日特別針對速度作特訓，實行「以快打快」，除咗加強兩翼側擊，仲要求兩閘跟貼敵軍前鋒，務求完全壓制對方嘅攻防兩端，後衞尹錫榮話：「菲侯利跑動積極、球風硬朗，不過我已經準備好守死佢！」況且外流巨星孫興民、奇誠庸等上仗都發揮到水準，繼續保持表現嘅話，南韓要贏波並唔係難事。
阿爾及利亞太倚重菲侯利

睇番阿爾及利亞上仗鬥比利時，僅負1:2嘅結果未至於太差，不過嗰場波「歐洲紅魔」嘅表現實在令小妹非常失望，雖然係咁，阿爾及利亞全場都係僅得35%控球權，大部分時間都處於捱打狀態，全場更只錄得3次射門，加上佢哋過分依賴菲侯利一個做突破，話咁易畀對手睇通條路，連進攻力都冇埋，又點頂住南韓進襲先？
Data King：南韓近10戰4勝

‧南韓喺1985年對過阿爾及利亞1次，當時以2:0擊敗對手。

‧南韓近10場比賽，取得4勝1和5負。

‧連埋今屆已連續8屆打入世盃決賽周，對上7屆有5屆喺分組賽止步。

‧踢過29場決賽周賽事，錄得5勝9和15負，攻入66球，失48球。
Data King：阿爾傳球成功率最低

‧阿爾及利亞上場對比利時，傳球成功率只係僅得61%，係決賽周32強中最低嘅一隊。

‧近10場比賽取得8勝2負。

‧3次打入世盃決賽周，全部都係喺分組賽出局。

‧10場決賽周賽事錄得2勝2和6負，攻入65球，失47球。
博埋南韓「主主」

今次嘅比賽場地阿萊格里港唔太熱，相信會有利南韓發揮，而且「太極虎」嘅醫務組長黃仁宇都話，球員對適應氣候已經做足準備，相信南韓今仗可以輕鬆贏波，上盤固然要捧，貪啲嘅可以玩埋半全場主主，有成3.3倍，值得一試。