墨西哥做克軍細界

猪拉多纳

神龍奧祖亞「零失」有保證

世界盃A組生死戰，克羅地亞鬥墨西哥，基於同組巴西九成九可以晉級，換言之，克墨兩隊只能活一隊，克羅地亞必須全取3分先至能夠出線，應會主攻，文迪蘇傑、莫迪歷、奧歷皆為高質素進攻球員，有充裕爭勝本錢。墨西哥和波都搞掂，難免會傾向保守，5人防線滴水不漏，門將奧祖亞踢到上晒身兩戰零失球，強如巴西都冇辦法喺佢身上搵到着數。預料今仗會係一場攻防戰，勝負變數多，寧揀入球細。

（TVB01及19、now 801及841周二凌晨4時直播）

墨西哥兩戰保持不失，「六指門神」奧祖亞居功至偉，特別上仗對巴西，佢屢救險球，包括飛撲出尼馬頭槌，可媲美英格蘭名宿哥頓賓士喺1970年世盃救出比利嘅必入頭槌。門將一打起信心，往往會有超水準發揮，無論對手點射都射唔入。
克羅地亞攻防戰怕反擊

奧祖亞嘅信心及狀態都處於巔峰，要攻陷佢十指關，絕對唔容易。不過，墨西哥火力較削，僅得1球進帳，唔多唔少因為使用532陣式，比較注重防守，進攻上依賴一對前鋒杜斯山度士、奧利比柏拉達自己搵食，特別係今場和波都出線，更加唔需要同對手鬥攻。

至於克羅地亞首仗輸畀巴西，好大程度上因為文迪蘇傑停賽導致捱打。呢位拜仁慕尼黑鋒霸上仗復出即梅開二度，盡顯功架，唔排除可以再下一城，贏埋墨西哥。不過，克羅地亞亦唔可以谷得太前，否則被對手突擊偷襲，形勢會非常惡劣，如果克羅地亞先打開紀錄，只會全力守住勝果。事實上，歐洲球隊今屆受到巴西濕熱氣候影響，體力上比美洲球隊輸蝕，難以保持全場搶攻，須提防克羅地亞下半場莫氣，咬唔入對手，所以都係捧細盤為妙，甚至悶和，可吼埋0比0或1比1波膽。
MARK實佢：克羅地亞後衞 達里祖史拉

即使已經32歲，但呢位右閘仍然有心有力，喺右路助攻助守，一人踢晒，上仗更創出時速32.98公里奔跑紀錄，成為今屆最快球員，令人肅然起敬。
MARK實佢：墨西哥前鋒 奧利比柏拉達

墨西哥今屆唯一入球，就係由奧利比柏拉達射入，呢位30歲前鋒雖然個子唔高，但衝刺力強，擅長執雞，佢嘅踢法喺穩守突擊戰術中大派用場。
02世盃墨國掃克

自從克羅地亞獨立以來，兩軍於國際賽共交手3次，最近1次喺2002年韓日世盃決賽周分組賽，墨西哥憑已退役嘅白蘭高射入12碼以1比0擊敗對手，最終亦取得16強資格，克羅地亞則排小組第3無緣出線，當時墨西哥隊長為今屆仍在陣中嘅「四朝隊長」馬基斯，現任克軍領隊尼高高華亦有份上陣，至於另外兩場熱身賽均由克羅地亞取勝。
亞洲最佳執法寬鬆

伊馬杜夫 Ravshan Irmatov

國籍：烏茲別克

年齡：36

曾執法主要大賽：08、11世冠盃、10世界盃、11亞洲盃

簡介：來自烏茲別克嘅伊馬杜夫之前曾主吹E組賽事瑞士對厄瓜多爾，全場只係畀咗兩面黃牌，執法算寬鬆，佢喺08至11年曾連續4年獲選為亞洲區最佳球證，4年前曾執法南非世盃決賽周嘅揭幕戰，以32歲成為自1934年以來最年輕嘅揭幕戰判官。

執法場數：115

黃牌數：296

紅牌數：26

判12碼：14

平均黃牌數：2.57

平均紅牌數：0.23

平均判12碼次數：0.12
Mic少推介：入球細