西班牙將帥反面難讓澳洲

猪拉多纳

世盃B組荷蘭同智利已經肯定出線，令到呢場澳洲對西班牙嘅比賽變咗例行公事，可惜，羞家出局嘅西班牙仲未知醜，賽前又爆內訌，法比加斯尋日操練同教練迪保斯基爭執，之後仲憤而離開練習場，加埋之前沙比插隊友，睇怕士氣低落嘅「狂牛」仲有排衰，今戰點計都讓唔起澳洲1/1.5球，揀2倍嘅下盤最明智！（TVB13及now818台周二凌晨0:00直播）

西班牙頭兩場踢得勁曳，搞到輸晒提早出局。「狂牛兵團」後防穿窿，門神卡斯拿斯又無復當年勇，據報碧基今戰亦因傷缺陣，防守力弱上加弱。守唔掂，攻亦唔得，佢哋一向引以為傲嘅Tiki Taka已經唔Work，領隊迪保斯基可能會喺今場波畀桑馬達、佐治高基同韋拿呢啲後備打正選，可能有成10個位換人，仲更加信唔過。
法比Hea住練波被迪帥勒令離場

最大鑊係呢班波家陣士氣極度低落，西班牙傳媒爆料，法比加斯尋日操練懶懶閒，畀迪帥當眾喪插，仲叫佢即場除低件正選龜背畀沙比阿朗素，法比仔咁樣畀人落面法，當然勁唔忿氣，一路駁嘴一路離場。同時，辛迪卡索拉、迪亞高哥斯達等亦相繼開腔，反駁沙比話隊友「冇鬥心」嘅指控，成隊波亂晒坑，點撐呀！

雖然澳洲都係提早「執包袱」，但佢哋上仗對荷蘭嘅表現有目共睹，輸波出局可謂雖敗猶榮。上場射咗球世界波嘅前鋒卡希爾今場坐波監，個正選位會由阿當泰加特頂上。論質素，「袋鼠兵」當然唔係西班牙嗰皮，但呢班波勝在齊心，反之「狂牛兵團」就一盤散沙，點計都係捧下盤好啲！