烏拉圭唔贏執包袱

猪拉多纳

悶熱天氣意軍催命符

死亡D組生死戰，亦係古典世盃之戰，首屆世盃冠軍烏拉圭對第二屆盟主意大利，得失球差較佳嘅「藍衣軍團」，今場只要打和烏拉圭就夠出線，預料意軍會以守為主，但佢哋守唔守得住烏拉圭雙箭蘇亞雷斯同卡雲尼係一大問題，今場「矛盾之戰」，平手盤科娜揀背城借一嘅烏拉圭！

（TVB 01及19、now 801及841周三凌晨零時直播）

先講D組形勢，兩支世盃冠軍意大利同烏拉圭同得3分，但意軍得失球較佳，力壓烏軍排第2名，即係話今場只要保持不敗就能出線，但「藍衣軍團」今場對住搏老命要贏嘅烏拉圭，真係咁易和到咩？
冇迪羅斯掃蕩好難頂

意大利今場應該會踢穩守突擊，以立於不敗之地，但「藍衣軍團」今屆世盃都算黑仔，傷完一個又一個，當門神保方、後衞迪施基利奧傷愈後，又輪到中場主將迪羅斯有傷，今場極大機會缺陣，意軍冇咗呢位鐵血防中，防守削弱，要守住狂攻嘅烏拉圭有啲難度。

另外，天氣先係意大利最大敵人，上場對住哥斯達黎加見到意軍踢到死氣沉沉，落後下谷都谷唔起，主因係悶熱天氣，中場馬治斯奧亦話天氣對佢哋嘅發揮影響極大：「我同簡達華都知道要幫手回防，亦要帶波上前進攻，我哋都想咁做，但天氣實在太熱喇，真係跑唔郁呀！」今場決戰城市納塔爾，天氣同上場比賽城市累西腓一樣咁悶熱，而且意軍仲要比烏拉圭少一日休息時間，球員體力存在好大問題。
阿蘇腳風順先發吼入波

相反南美洲國家烏拉圭擁有半個主場之利，完全唔驚氣候影響體力嘅問題，上場對英格蘭喺一定要贏嘅情況下，見到烏拉圭班球員好似有用唔完嘅體力，瘋狂逼搶，搞到英軍組織唔到攻勢，更被逼到猛咁犯錯，今場對意大利又係非贏不可，烏拉圭應該都會繼續扯乾意軍，等對方有氣冇碇抖，然後靠猛虎出閘嘅蘇亞雷斯同空中霸王卡雲尼兩位食胡，所以平手盤要烏拉圭之外，亦可以揀埋阿蘇今場特別項目先發事件「入球」。
MARK實佢：烏拉圭前鋒 卡雲尼

有身材有技術，擅於捕靚位搶點攻門，頭槌同罰球都掂。蘇亞雷斯復出後，卡雲尼又做番阿蘇「背後的男人」，要經常回後攞波，幫手拉開防線，為阿蘇製造空位，名副其實係「最佳男配角」。
MARK實佢：意大利後衞 達美安

分組賽對英格蘭係呢位24歲後衞第2頂喼帽，但演出一鳴驚人，喺右路助攻助守，有06年冠軍功臣格羅素嘅影子。佢出身AC米蘭青年軍，17歲就首戰意甲，打破埋馬甸尼最年輕嘅意甲上陣紀錄。
對戰和局多總入球旺「2球」

兩隊曾多番碰頭，回顧近6次對壘，有半數係和氣收場，贏波次數就烏拉圭稍佔上風，贏過2次。兩軍交手入球量唔多，上述6仗中有5次開細，僅1次開大。另外亦旺總入球「2球」，共開出4次。
摩連奴作風騎呢每兩場派一紅

國籍：墨西哥　

年齡：40

曾執法大賽：06、10世界盃；05、07、09、11、13美洲金盃；03、05、13世少盃

簡介：摩連奴場內名聲一般，行家普爾曾批評佢喺06年世盃執法水平業餘，又試過一場波同時高舉兩張黃牌，非常騎呢。摩連奴可以話係「球員殺手」，執法國際賽生涯平均每兩場就會派一張紅牌。今屆佢曾執法H組比利時對阿爾及利亞一仗，該仗共派出兩張黃牌及一個12碼。

執法場數：80

黃牌數：352

紅牌數：51

判12碼：30

平均黃牌：4.40

平均紅牌數：0.64

平均判12碼次數：0.38
科娜推介：烏拉圭平手盤