哥斯拉保首砌頹獅

猪拉多纳

領隊拚勁瓣瓣贏

打大賽一向冇料到嘅英格蘭成為死亡D組首支出局球隊，不過估唔到係被視為魚腩嘅哥斯達黎加竟然化身「哥斯拉」，連殺烏拉圭同意大利，成為呢組首支出線16強嘅球隊，今晚「哥斯拉」對戰「頹獅」，識揀一定揀受讓嘅「哥斯拉」，捧讓球主勝！

（TVB 13、now 818及840周三凌晨零時直播）
鶴臣亂晒龍 英軍冇運行

英格蘭頭兩場輸晒羞家出局，領隊鶴臣孭晒鑊，呢位庸帥無論喺排陣、戰術部署、臨場調動上都係令人「拍案叫絕」，首仗對意大利，明明見到左後防受到重壓，鶴臣竟然冇加強左路防守，結果喺左路失咗第2球，落後下更作出「神級換人」，換走體力充沛嘅佐敦軒達臣，留番抽晒筋嘅史達寧同謝拉特喺場上。去到第二場對烏拉圭，鶴臣冇派人專門招呼蘇亞雷斯，結果阿蘇梅開二度踢英軍出局。英格蘭一日由呢位淨係識捽面嘅庸帥帶領，就唔會有好日子，更何況出局後班球員變晒「頹獅」，對住士氣如虹嘅哥軍點讓得起。

同鶴臣相反，帶領哥斯達黎加連贏兩場嘅領隊路爾斯賓圖堅有料，佢戰術運用得宜，再加上球員嘅拚勁同旺盛嘅鬥志，成功喺死亡D組突圍。哥軍依家以6分排喺榜首，今場只要不敗就首名出線，所以今場唔會放鬆，誓要守住榜首之位，捧讓球主勝！
博朗尼冇料到被換出

特別項目方面，上場朗尼終於打破世盃嘅入球荒，但表現唔叫得做好好，若果今場上半場都冇起色，隨時畀鶴臣下半場調走，試吓啲新人好過，先發事件不妨博吓4倍嘅「被換出」。
首度交鋒做足功課

今次為雙方首次對壘，兩隊賽前都曾安排同類型球隊踢熱身賽，其中哥斯達黎加在世盃開鑼前曾經約戰愛爾蘭，結果踢成成1比1，至於英格蘭亦曾約戰同屬中美洲的洪都拉斯，最後賽和0比0。
海默迪黃牌暗藏入球祝福？

國籍：阿爾及利亞　

年齡：39

曾執法大賽：非國盃（08、12、13）、11世青盃、12世冠盃

簡介：海默迪今屆執法過B組分組賽澳洲對荷蘭，喺該仗只出示過兩張黃牌，但領牌兩名球員卡希爾同尹佩斯都有波入，唔通佢出黃牌等於祝福。09年世盃外科特迪瓦主場對馬拉維開始前，出現人踩人情況，最終造成22死過百人受傷慘劇，但執法嘅海默迪堅持賽事繼續進行，被指麻木不仁。

執法場數：66

黃牌數：220

紅牌數：10

判12碼：16

平均黃牌數：3.33

平均紅牌數：0.15

平均判12碼次數：0.24
科娜推介：哥斯達黎加讓球勝