象國帛金波有計

猪拉多纳

誓贏希臘 出線獻托尼亡弟

「為伊巴謙而戰！」科特迪瓦於C組最後一戰對希臘，贏波就肯定取得出線資格，耶耶托尼及高路托尼嘅細佬伊巴謙托尼日前因癌病離世，但二人都冇離開巴西奔喪，而全隊上下都會為伊巴謙而戰，希望將勝利獻畀佢，加上科特迪瓦總統出雙倍贏波獎金振奮士氣，鬥志不容懷疑。希臘兩戰只得一分未入過波，仲有隊長防守中場加素蘭尼斯停賽，影響攻守，更難阻止「象國」科特迪瓦進襲，科軍讓平半上盤要捧。

（TVB01及19、now 801及841周三凌晨4時直播）

科特迪瓦今仗只要擊敗希臘，不論同時間進行嘅另一場C組比賽日本對哥倫比亞賽果如何，都肯定首次殺入世界盃16強，嚟到呢個咁歷史性嘅時刻，關乎國家榮譽，托尼兄弟決定將所有嘢放埋一邊，專心踢好呢場波。

二人嘅細佬伊巴謙托尼日前因癌病離世，雖然一度傳出二人會離開，去到細佬出生兼離世嘅地方英國曼徹斯特處理身後事，但最終二人決定選擇留低，可見佢哋幾咁重視呢場比賽。事實上，「象國」中堅索高拿因累積兩面黃牌今仗要停賽，高路托尼要頂上，造就托尼兄弟同場搏殺，而國家隊亦會喺開波前，自己進行默哀，球隊上下都一條心，誓要將勝利獻給天上嘅伊巴謙托尼。科特迪瓦總統賽前宣布，如果贏波出線，球隊贏波獎金會由原本18,000歐元（約18萬港元）增至36,000歐元（約36萬港元），重賞之下必有勇夫，決心不用懷疑。
希臘大巴戰術過晒時

希臘時至今日仍然靠2004年捧歐洲國家盃嗰套，死守突擊一早畀人摸到通透晒啦，唔係放架大巴喺度就搞得掂，佢哋今屆踢咗兩場都未入過波，攻力真係有限公司，而且防守中場加素蘭尼斯上仗對日本被紅牌趕出場，冇咗佢嘅掃蕩，少咗第一道屏障，對於「泊大巴」嘅希臘有啲濕滯，難頂科特迪瓦沙洛文卡勞、韋菲特邦尼同謝雲奴嘅狂攻，一於撐上盤。另外，亦力撐耶耶托尼入波慰細佬在天之靈，首名入球有5.5倍，可預番一票。
MARK實佢：科特迪瓦中場 耶耶托尼

盤扭及射術一流，經常從自己中後場攞波，再自己帶波到對方前場數胡，今季助曼城贏得英超冠軍，呢名三屆非洲足球先生已經傷愈，令科特迪瓦攻守實力倍升。
MARK實佢：希臘前鋒 森馬拉斯

呢名29歲前鋒雖然喺些路迪已經唔係必然正選，但每逢出場都會搏盡，雖然身高1米93，但腳下功夫及速度一啲都唔差，以希臘嘅穩守突擊戰術，佢喺前面有牽制作用。
希臘象國首碰頭

希臘同「象國」科特迪瓦此前從未交過手，希臘過去10年，只曾3次同非洲球隊比賽，勝和負各一，包括月初同另一支決賽周分子尼日利亞打和0比0。科特迪瓦近10次同歐洲球隊對賽，取得3勝5和2負。另外，雙方之前同樣兩次出席世界盃決賽周，但都無法突破分組賽階段。
厄國判官上場吹悶波

華拿 Carlos Vera

國籍：厄瓜多爾

年齡：37

曾執法大賽：11美洲國家盃、南美自由盃、南美球會盃

簡介：厄瓜多爾籍嘅華拿喺06年成為國際球證，曾執法美洲國家盃、南美自由盃等大賽，佢今屆主吹過F組伊朗對尼日利亞，雙方打和0比0，而且只出過一張黃牌，場面相當悶。今屆第二次執法，又遇上非洲球隊科特迪瓦，希望到時戰情可以精彩一啲啦。

執法場數：66

黃牌數：299

紅牌數：24

判12碼：14

平均黃牌：4.53

平均紅牌數：0.36

平均判12碼次數：0.21
渡邊年推介：科特迪瓦（上盤）