哥斯達黎加都唔赦英格蘭

猪拉多纳

玩副選

英格蘭今晚會上演今屆世盃最後一戰，硬撼「巨人殺手」哥斯達黎加。小妹認為「三獅軍」一日由鶴臣領軍，一日都唔會有好日子過，呢位老帥備受名宿、傳媒「圍插」，事先張揚今仗會出「生牯仔」，咁咪益晒和波都肯定首名出線嘅哥斯達黎加囉，哥軍受讓1球，梗係撐2.1倍「讓主」啦！

（TVB13及now818台周三凌晨0:00直播）
鶴臣賴死 戴定頭盔出副選

鶴臣早喺教利物浦嗰陣已經見晒底，戰術老土之餘調動更加係一塌糊塗，如果唔係史杜列治同史達寧佢哋曉「自動波」打番紅軍嘅突擊，怕且之前兩場分組賽一球都入唔到咯。不過就算連尼加、阿當斯、堅尼等名宿，聯同《鏡報》、《每日郵報》等傳媒齊齊鬧爆鶴臣冇料到，呢位老帥都一樣勁厚面皮，話自己係領軍出戰2016年歐國盃嘅「Mr. Right」，仲一早「戴定頭盔」，話今仗會出班後生仔，「為未來做準備」喎，都係嘅，講到明試陣吖嘛，即係輸波都唔使負責囉！

不過後生仔係咪真係靠得住先？昆士柏流浪領隊夏利列納早排就怒插班英格蘭球員，話佢哋由青年軍時代開始，就已經唔熱衷踢國際賽，一心留喺球會賺大錢：「我以前教熱刺嗰陣，陣中有唔少英格蘭國腳，佢哋根本就唔想為國出戰！」除咗冇鬥心，冇國家榮譽觀念，巴克里、拉爾拉拿、史達寧呢班効力唔同球會嘅年輕球員，缺乏國際賽經驗兼冇乜夾過，同拉雜成軍有咩分別先？
FIFA藥檢苛刻 哥軍一肚火

哥斯達黎加嘅世盃奇妙之旅，家陣進入第3站，領隊路爾斯賓圖話會畀班冇上過陣嘅球員落場，不過佢哋士氣如虹，就算係副選，咪一樣會搏甩髀！加上之前國際足協有心「玩嘢」，係咁捉啲哥軍球員去驗尿，非常唔尊重呢隊「巨人殺手」，呢啖氣，哥斯達黎加又點會吞得落先？最好向世人證明哥軍係真材實料嘅方法，當然係砌低埋英格蘭，繼續佢哋嘅世盃神奇之旅啦！
Data King：哥斯達黎加旺半細

‧哥斯達黎加近8場比賽全部開出半場細。

‧近10戰取得4勝1和5負。

‧近2場分組賽錄22次射門10次中框，攻入4球。

‧喺90年、02年同06年第3場分組賽成績為1勝2負。
Data King：英格蘭近10戰僅4勝

‧英格蘭近2場平均傳球成功率達81%

‧近10戰僅錄得4勝2和4負。

‧近3屆第3場分組賽成績為1勝2和。

‧近2場波射門次數總共有31次，只得16次中框。
乜都玩錦囊：兩軍等收工博細

哥斯達黎加今場和波都可以首名出線，而且佢哋會派部分副選落場，未必會鹵莽進攻。無欲無求嘅英格蘭亦都唔見得會有幾積極，唔使旨意呢場波可以上演入球騷，1.92倍入球細值捧。