法國迎擊大變陣

猪拉多纳

厄瓜多爾奇兵襲鐵塔

E組最後一輪分組賽，厄瓜多爾於里約熱內盧馬拉簡拿球場鬥法國。法國今場只需和波便肯定取得首名出線資格，不過佢哋防線受到傷病問題影響，有機會被狀態當銳嘅厄瓜多爾射手安拿華倫西亞乘虛而入，好彩法國兩大射手賓施馬、基奧特同樣咁弗，兩軍為爭出線隨時出現駁火情況，首選入球大。

（TVB13及19、now 818及840周四凌晨4時直播）
賓施馬基奧特交到貨

目前E組4支球隊仍有機會爭出線，兩戰得6分嘅法國形勢最好，今場只要和波便肯定取得小組首名，就算輸波，由於佢哋比得3分嘅厄瓜多爾和瑞士喺得失球差方面至少有6球優勢，除非法國今仗大敗、同時間瑞士又能狂數洪都拉斯，否則法國嘅前兩名出線資格亦好穩陣。

法軍賽前收到壞消息，頭兩場擔任正選中堅嘅華拉尼因患上腸胃炎好大機會缺陣，佢嘅拍檔馬馬度沙高亦有輕傷在身，有可能要起用阿仙奴嘅哥斯尼夥拍波圖守將文加拉鎮守中路，加上防守中場卡比耶累積兩面黃牌要停賽，中場截擊力減弱，隨時被今屆入咗3球嘅厄瓜多爾前鋒安拿華倫西亞有搵食機會。好彩法國幾個前鋒都交到貨，除射手賓施馬之外，其他中前場球員包括基奧特、華布拿，甚至上場冇份打正選嘅保羅普巴或基沙文踢來都虎虎有威，經過兩輪分組賽更係入波最多嘅球隊之一，踢法充滿侵略性。既然今仗後防陣容不整，鋒線之前又Run得咁順，領隊迪甘斯實冇必要叫球員刻意收油改變踢法。
先發入球雙鋒兼投

厄瓜多爾現時以較佳得失球差壓倒同分嘅瑞士排第2，如果今場失分而瑞士於另一邊賽事擊敗洪都拉斯，厄瓜多爾便會將出線資格拱手相讓，故此佢哋亦冇失分空間。既然兩軍射手都咁弗，除捧大盤外，特別項目可以雙選賓施馬及安拿華倫西亞「先入球」。
法國前鋒基奧特

唔少法國球迷決賽周前都認為基奧特只係隊中後備，但上場對瑞士已證明咗佢同賓施馬可以並存，上次先開紀錄嘅頭槌好考騰空力和頂上功夫，之後助攻畀華布拿，亦充分顯示佢嘅閱讀球賽能力。
厄瓜多爾中場 謝法臣蒙迪路

厄瓜多爾前線除咗已入3球嘅射手安拿華倫西亞，左中場謝法臣蒙迪路亦不能忽視，呢名曾經喺西甲搵食嘅翼鋒有速度、有腳法，唔單止傳中波有威脅，自己亦可以扣關射門，和隊長路爾斯華倫西亞真真正正做到雙翼齊飛。
記仇巴西人只識施丹唔知賓施馬

法國今屆目前為止表現最好嘅應該係前鋒賓施馬，不過講級數，暫時佢未可以同球王施丹相比，事關巴西電視台《EPTV》日前去咗法國訓練基地附近做咗個民意調查，喺市中心街道擺咗施丹、柏天尼、賓施馬同列貝利嘅相，睇吓邊個最受歡迎。好多巴西人都唔知「賓仔」同列貝利係乜水，反而就話化咗灰都認得施丹，梗係啦，巴西喺98世盃決賽輸波就係因為施丹兩個頭槌喎！

不過唔係個個巴西人都唔妥法國，當地諧星利馬日前大玩Cosplay扮法國卡通《高盧英雄傳》入面嘅角色Obelix，仲叫自己做「列貝利斯」，大撐「高盧雄雞」奪冠，反骨到出汁！
安拿華倫西亞綽號「超人」

而厄瓜多爾陣中球員原來個個都有花名，前鋒安拿華倫西亞頭兩仗入三粒成為該國球迷新寵兒，原來佢綽號叫做「Superman」，另外門將阿歷山大杜明基斯因為身高1米96，隊友都叫佢做「迪達」，喺中場又瘦又In、外形似足尼馬嘅費度馬天尼斯就有「尼馬天尼斯」之稱，淨係聽嗰名真係嚇死人。
笛子波童推介：入球大