評述總動員好墟冚！

猪拉多纳

兩場同時踢 高潮迭起

世界盃進入分組賽最後一輪，同組兩場比賽同時間開波，就係為咗避免睇住另一場嚟踢呢種情況出現。邊有球隊會想揀條難行嘅路？梗係出盡法寶達到目標，結果睇到尋日朝早巴西同墨西哥呢兩場踢到尾仲高潮迭起，球迷睇波要有耐性睇到尾，千祈咪以為一早大局已定！
爆響口防操控見效

因為兩場波同時直播，我哋專業評述團成員悉數亮相，仲有聲勢浩大嘅低俗講波團，大家都係差唔多咁上下時間返到無綫換衫同化妝，撞啱戲劇組啲藝員同事趕住換戲服入廠，真係令到服裝間旺過旺角，好在服裝間同事夠經驗處變不驚，之後喺化妝間排隊等幫塊面「油灰水」，大家自不然傾吓波經，但對眼唔敢四圍望，事關周圍都係衣着火辣嘅低俗講波團美少女！

我哋幾個講波佬都覺喺巴西對喀麥隆比賽之前，有關方面專登放料話有亞洲菠菜公司會操控呢場比賽嘅傳聞，係唔係真無得證實，反而有啲無間道嘅感覺，總之冇都當有，出咗聲先警告咪亂嚟，果然喀麥隆出全力去作賽，無人夠膽批評呢種有前冇後嘅踢法係假波，但係咁樣就啱晒巴西踢反擊入多幾球，最終以較佳嘅得失球差力壓墨西哥成為A組首名。

其實，墨西哥都好有計謀，對住克羅地亞上半場按兵不動，到下半場至發難，希望另一邊嘅巴西唔夠時間入多幾粒，殊不知喀麥隆玩對攻咁就今夜不設防，不過墨西哥次名出線16強對荷蘭，話唔定易踢過對智利o架！