給迪保斯基的一首歌

猪拉多纳

當直播時睇住韋拿入波同埋被換出場個可憐樣，有份喊及有份鬧嘅朋友請揮手！迪保斯基，你都係球員出身，應該好明白一個球員被選入國家隊，一定好想為國家上陣，加上仲要係球員職業生涯最後一屆代表國家，呢屆世盃對韋拿有幾咁重要，你唔會唔明白囉！究竟韋拿得罪你啲咩，點解你要咁玩佢？
換走韋拿 唔認自己衰咗

你玩謝國家隊，提早送西班牙一程。頭兩場唔用韋拿，如果嫌人年紀大咪用佢打後備囉，但連後備落場機會都冇，真係夠晒恨心。

好喇，到第三場例行公事，你終於肯用番一代男神韋拿，而且佢仲爭氣有波入。唉，你老人家接受唔到用人不當嘅事實，驚韋拿入多幾球剃你眼眉，急急腳喺下半場55分鐘換走球場中最閃亮嘅韋拿，真係睇到人火滾。

各位球迷，迪保斯基搞到韋拿咁樣，係咪好冇陰功？相信一班西粉睇完呢三場小組賽，都想送一首歌畀迪帥，就係Beyond嘅「我是憤怒」，因歌詞已唱出重點「我是憤怒，分分鐘可燒死你」，而韋拿又可以唱咩歌呢？都應該係Beyond嘅「我早應該習慣」，既然頭兩場佢都夠膽死咁排戰術同調動球員。韋拿當被換出時真係要唱「我早應該習慣，原來是沒有稀奇」。