葡萄牙唔夠料讓加納

猪拉多纳

上仗搏殘 士氣低落

除咗美德大戰外，G組仲有一場葡萄牙對加納同時舉行，兩軍形勢都相對被動，但無論如何今場贏唔到就必然出局，預期會係對攻格局，入球唔會少，不過入球大得番1.59倍冇肉食，相比之下，葡萄牙士氣同體能都出現明顯問題，面對硬淨嘅加納讓唔起波，加納受讓平半值得一試。

（TVB 01、now 801及841周五凌晨零時直播）

葡萄牙喺今屆賽事頭頭碰着黑，王牌球星基斯坦奴朗拿度開賽前就受到傷患困擾，頭兩場分組賽雖然踢足全場，但表現同最佳水準相差甚遠，上仗雖然靠佢完場前一記妙傳得以逼和美國，保留出線希望，但佢賽後指出以葡萄牙實力，出線難度高，想爭冠軍更加諗都唔使諗。呢啲言論立即惹起隊友抱怨，右閘荷奧彭利拿更公然質疑佢嘅講法，認為佢唔應該抱怨隊友嘅能力，領隊保羅賓圖喺排陣同用人方面亦惹來各方批評，隊內氣氛認真麻麻。
比比復出再做計時炸彈

葡軍喺首場分組賽已經有門將魯爾柏迪斯奧，左閘法比奧干查奧同前鋒曉高艾美達受傷，球隊兵源同實力都削弱，上仗對美國戰至最後時刻至扳平，搏得相當殘，今仗雖有中堅比比停賽期滿復出，但鹵莽衝動嘅佢隨時又會喺陣上發癲，有呢個計時炸彈在陣好可能衰多兩錢重。
加納突擊德國都驚

加納啱啱爆出球員不滿拖欠出場費同獎金風波，不過今次連總統都出面安撫球員，相信可以解決問題，事實上加納過去兩場比賽展現出嚟嘅鬥志同實力都相當強，尤其上仗憑穩守突擊，打到德國都手忙腳亂，只要佢哋能夠專心作戰，今晚贏面不在葡萄牙之下，何況葡萄牙目前形勢係四隊中最惡劣，想出線今仗就要大比數擊敗對手，一開始就要搶攻，防線會露出更多空位，只要加納踢番上仗對德國嘅反擊效率，葡軍想唔失波都幾難。
葡萄牙翼鋒拿尼

基於養傷多時同喺球會上陣唔多，拿尼嚟到巴西一直低調，但陣上表現卻予人驚喜，首戰德國慘敗，但佢表現已經係球隊最佳一人，上仗對美國更開賽不久即入波，喺C朗缺態嘅情況下，佢成為葡軍爭勝重要武器。
加納中堅約翰保耶

効力法甲雷恩嘅約翰保耶嚟到巴西如坐過山車，首戰美國踢到失晒魂做輸波罪人，不過領隊艾卡華斯艾比亞堅持信任佢，上仗對德國終於畀佢正名，全場一夫當關頂住德國連番攻勢，成為加納該役評分最高嘅球員。