巴西歎私房菜舔舔利

猪拉多纳

16強頭炮 南美大佬恰細佬

世界盃16強頭炮，東道主巴西迎戰智利，歐洲球隊成績慘淡，今屆賽事幾乎變成「美洲國家盃」。「南美大佬」巴西成為最大得益者，人腳佔優之餘，又熟悉對手路數，可以格食格，食住上。特別係智利一直屬於巴西嘅「私房菜」，雙方史上3次於世界盃淘汰賽交鋒，「森巴兵團」都淨贏智利兩球或以上，更何況仲有主場之利，夠晒信心保證。巴西讓半一，直取上盤。

（TVB13及19、now 818及840周日凌晨零時直播）

美洲球隊今屆大豐收，好大程度因為歐洲隊唔適應當地氣候，而非美洲整體足球水準大躍進，講到尾區內勢力始終係巴西同阿根廷鶴立雞群，對住同洲對手，勝算相當高。未知係「刻意安排」，抑或幸運之神眷顧，上屆冠軍西班牙出局，益晒巴西遇上智利，可以話係已經一隻腳踏入8強，因為兩隊對賽，「森巴兵團」佔壓倒性優勢，就以近12次交手為例，巴西獲得10勝2和，包括上屆16強3比0大炒智利。
智利「防反」踢法見光死

靚數據支持下，未開波巴西球員心理已佔優，而且佢哋愈踢愈上力，上仗連被嘲笑為「廢特」嘅費特都有波入，有助提升呢位射手嘅信心，唔使太依賴尼馬數胡，如果智利認為嚴密看管呢位巴塞球星，就可以切斷巴西進攻泉源，咁就大錯特錯。

無可否認，智利今屆「防反」踢法好有效率，的確令人眼前一亮，但上仗分組賽已被荷蘭識破戰術漏洞，關鍵在於箝制中場馬些路戴亞斯，就可以打斷智利反擊路線。現時呢支巴西特別多工兵型中場，足以周密招呼呢位瑞士巴素利球員。智利另一位中場主力維達爾有傷在身，即使紮住上，恐怕難以發揮正常水準，甚至成為負累。以智利上仗吞荷蘭兩蛋嘅表現，更加唔係巴西嘅對手。
巴西

主要後備：16拉美利斯(中場)、18靴蘭尼斯(中場)、19韋利安(中場)、20班納特安尼斯奧(前鋒)、21祖奧(前鋒)

入球球員分布：尼馬(4球)、費蘭甸奴、費特、奧斯卡杜斯山度士(1球)

入球時間分布：0-15分鐘(0球)、16-30分鐘(2球)、31-45分鐘(1球)、46-60分鐘(1球)、61-75分鐘(1球)、76-90分鐘(2球)

黃牌在身：尼馬、路爾斯古斯達禾、拉美利斯、堤亞高施華
智利

主要後備：10佐治華迪維亞（中場）、16菲臘比古迪利斯（中場）、6卡路士卡莫拿（中場）、9賓利拿（前鋒）

入球球員分布：阿歷斯山齊士、艾蘭古斯、包爾斯亞、佐治華迪維亞、伊度亞度華加斯(1球)

入球時間分布：0-15分鐘（2球）、16-30分鐘（1球）、31-45分鐘（1球）、46-60分鐘（0球）、61-75分鐘（0球）、76-90分鐘（1球）

黃牌在身：艾蘭古斯、維達爾、烏真里奧文拿、法蘭斯高施華
巴西對戰贏48次

由於巴西同智利兩軍都係來自南美洲，所以雙方歷來都對碰過唔少次。只不過論往績，森巴兵團一面倒佔優，喺合共68次嘅碰頭中，巴西竟然贏咗48次咁多，相反智利只有7次報捷。而雙方喺世界盃中就只有三次交手，巴西同樣大獲全勝，而且贏得頗為輕鬆。其中喺上屆南非世界盃決賽周，兩軍喺16強相遇，結果巴西以3比0大勝晉級。而就算返到1962年決賽周，智利有主場之利都喺4強輸２比４，名副其實「格食格」。
冇「利衝」曼聯御哨啱數

韋比 Howard Webb

國籍：英格蘭　

年齡：42

曾執法大賽：英超、歐聯、08歐國盃、09洲際國家盃、10世界盃、12歐國盃、13洲際國家盃

簡介：世盃進入淘汰賽階段，最公平梗係搵已出局球隊嘅球證執法，英格蘭光頭球證韋比係自從意大利名哨哥連拿退役後，當今最知名球證之一，更有「曼聯御用球證」之稱，由於今場唔關曼聯事，英格蘭亦已出局，所以唔使驚韋比好似吹曼聯啲比賽咁，偏幫任何一隊。韋比亦係上屆世界盃決賽嘅主裁判，該仗荷蘭中場尼祖迪莊向沙比阿朗素使出穿心腿，但韋比只出示黃牌，事後佢承認判決有誤，算係一個有承擔嘅球證。

執法場數：112

黃牌數：452

平均黃牌：4.04

紅牌數：21

平均紅牌數：0.19

判12碼：23

平均判12碼次數：0.21
Mic少推介：巴西（上盤）