正氣「哥」食橙唔奇！

猪拉多纳

毒哨吹唔死 場場搏甩髀

每逢大賽球證嘅判決有問題時，就必定有人提出「足球應否引入更多科技協助執法？」呢個問題，今屆世界盃當然唔例外！好彩喺咁不利嘅環境底下，都有國家隊可以絕處逢生，呢隊就係墨西哥嘞！

墨西哥喺分組賽曾經連環畀球證嘅「毒哨」所累，好彩成功激發起佢哋不屈不撓嘅精神。呢班波已經連續6屆世盃殺入淘汰賽階段，叫佢哋做「分組賽專家」都不為過。雖然近20年嚟未入過8強，不過嚟到今屆應該好大機會突破喇！呢隊墨西哥韌力十足，佢哋喺分組賽遇上連「球王」都冇符嘅球證，經歷過真正考驗，對喀麥隆嗰場有兩個有效入波畀旁證「吹走」，最後一輪對克羅地亞，球證又睇漏對手一個明顯嘅禁區內手球，真係少啲卡士都死！

好在，「仙人掌」墨西哥並無因為「盲眼判官」洩氣，反而繼續努力爭取入球，結果兩場都成功擊敗「昏哨」贏波。連場苦戰之下，就連本來唔起眼嘅門將奧祖亞都「一戰成名」，佢話：「我哋雖然習慣咗16強止步，但今屆我哋想走得更遠。」聽佢咁講，成班波個心有幾雄可想而知，我絕對信佢哋做得到！
哥倫比亞晉級在望

上屆亞軍荷蘭喺分組賽冇乜受到考驗，但對澳洲時就暴露出一旦受壓防線即散嘅缺點，只能靠前線入多幾球補數。不過今場對手墨西哥條鋒線唔好惹，杜斯山度士同查維亞靴南迪斯已經開咗齋，萬一同荷蘭快打快，「橙軍」後防相信唔易頂？我睇好16強重心冷門嘅「正氣哥」墨西哥，可以殺入8強。

另邊廂嘅希臘，就一定要多謝球證幫手先有16強踢，可惜佢哋聽晚嘅對手，係今屆神奇到爆嘅哥斯達黎加，睇嚟都可以順利提早畢業喇！反觀幾隊熱門好似法國、阿根廷同德國16強對手唔算強，預計贏波無問題，而小弟一直力撐嘅哥倫比亞亦有望再晉一級。