天氣幫手雙哥有前途

猪拉多纳

今屆世界盃幾乎變成美洲國家盃，皆因天氣對歐洲球隊打擊非常大，賽事踢到愈後階段，體力分野將愈明顯，來到淘汰賽，美洲代表嘅優勢會更大。今晚兩場16強賽事，荷蘭對墨西哥及哥斯達黎加對希臘，細鬼睇好雙「哥」晉級，尤其係墨西哥表現四平八穩，強如東道主巴西都贏唔到佢哋，今仗受讓平半，必捧下盤。

可以晉級16強，反映球隊本身有一定質素。墨西哥分組賽表現具說服力，踢法實際防守穩健，分組賽同巴西同得7分，可見呢支中北美勁旅唔嘢小。事實上，墨西哥屬於世盃常客，對住名牌球隊唔會怯場，無論之前對巴西，亦或今場鬥荷蘭，都唔會輸蝕。

荷蘭成績亦好，但問題係太依賴洛賓，好多時靠佢嘅速度爆開對手，就算射手尹佩斯都要靠佢供應傳送，一旦洛賓被對手凍結，荷蘭進攻隨時癱瘓。加上打到淘汰賽，雙方都驚輸波出局，踢法難免比較保守，捧受讓下盤較着數。
哥斯達黎加體能壓希臘

另一支中北美洲球隊哥斯達黎加，絕對係今屆最大驚喜，球員有鬥心、體力好，可以擊敗烏拉圭及意大利，認真唔簡單。反觀希臘出線帶有幸運成分，實際表現麻麻，主力年齡偏大，遇上哥軍體力型踢法，應該會處下風，平手盤要哥斯達黎加。