希臘平手有Chance

猪拉多纳

大賽經驗贏晒哥斯

今晚16強有場「神奇之戰」，哥斯達黎加公認係今屆世界盃嘅神奇球隊，對手希臘就曾經創造過爆冷捧走歐國盃嘅奇迹，論神奇程度，當然係希臘神過哥斯達黎加，所以平手盤不妨博吓希臘。
和波賠率偏低哥斯達黎加唔易贏

當然，希臘創造神迹已經係10年前嘅往事，以今屆兩隊喺分組賽嘅表現比較，能夠喺「死亡之組」首名突圍嘅哥斯達黎加，遠遠標青過希臘好多，所有菠菜公司都開主勝低過客勝，明顯就睇好哥斯達黎加半線，足智彩個主W亦由前日嘅2.6倍微調到尋日嘅2.55倍，證明買波嘅都睇好佢哋少少。

但係依家打嘅係淘汰賽，90分鐘守得住，加時同12碼可以發生啲乜冇人知。希臘衰衰相咁都能夠憑最後一場贏咗科特迪瓦出線，本身就好離奇，呢班老波骨大賽經驗豐富過哥斯達黎加，法定時間頂住唔輸並唔係奇事，睇吓包括足智彩在內一啲公司，個和波低過平均值，就知平手盤希臘未必冇Chance。