奇兵哥斯達黎加粉碎希臘神話！

猪拉多纳

遇強愈強 似勵志漫畫

今屆世盃16強球隊當中，最予人驚喜嘅一定係哥斯達黎加！身處死亡D組，賽前被睇死墊底……點知哥斯達黎加竟然喺3場分組賽拎到2勝1和，以小組首名殺入16強，震驚全世界！雖然呢支神奇球隊陣中冇大牌球星，但成隊波整體表現出色，極有04年「希臘神話」嘅影子！今晚佢哋同「師兄」合演「神之對決」，小妹就睇好哥斯達黎加，可以開出2.55倍主勝喇！

（TVB13及now818台、中央5台周一凌晨4:00直播）
米路打氣：差90分鐘創歷史

呢場波畀小妹嘅感覺，就好似勵志漫畫嘅橋段咁，「奇兵」哥斯達黎加喺分組賽以3:1打殘烏拉圭，又以2:1擊敗意大利，最後一戰求其Hea踢，都可以賽和英格蘭0:0，強勢殺入16強，的確令唔少球評家大跌眼鏡。事實上，呢支「神奇球隊」進身淘汰賽，已經追平佢哋喺1990年意大利世盃嗰陣嘅紀錄，所以哥斯達黎加嚟緊每晉一級，都係創造緊新嘅歷史，難怪90年功勳教練、前國足主帥米路去探班嗰陣，都用「你哋只差90分鐘就創造歷史」嚟打氣啦！

經過呢3場分組賽之後，「阿哥」家陣士氣爆到嘭嘭聲，班人仲開始心雄，話目標係要拎世界盃冠軍添！係就係大想頭咗啲，但10年前，又有邊個估到希臘會捧歐國盃先？雖然哥斯達黎加冇星級球員壓陣，但佢哋嘅整體戰術堅好睇，而且條防線3戰只失1粒，同墨西哥並列今屆世盃防守王，可見領隊路爾斯賓圖絕對係有料之人，以希臘嘅鋒力，又點搞得掂佢哋呀！
希臘靠呃入16強

相反，雖然係「神話師兄」，但希臘喺分組賽嘅表現真係好唔掂，首戰吞哥倫比亞3蛋，第二場對日本亦只能打成平手，到最後一場嘅最後一分鐘，先靠森馬拉斯呃個12碼返嚟KO對手，3戰僅入2球，失4球，正式係攻又唔得守又唔掂！今晚佢哋對住愈戰愈勇嘅哥斯達黎加，怕且唔慌有運行，2.55倍主勝冇走雞啦！
王牌比併：拜仁雷斯

効力球會 燕豪芬（荷甲）

上陣時間 260'07"

入球 1球

射門次數（中框率） 4次（50%）

助攻 0次

被攔截（成功率） 5次（80%）

跑動距離（平均每場） 9806米

最高時速 26.68公里

傳球次數（成功%） 116（78%）
王牌比併：森馬拉斯

効力球會 些路迪（蘇超）

上陣時間 289'16"

入球 1球

射門次數（中框率） 5次（40%）

助攻 1次

被攔截（成功率） 16次（31%）

跑動距離（平均每場） 9727米

最高時速 30.71公里

傳球次數（成功%） 92（65%）