德國當為8強熱身追打沙漠之狐

猪拉多纳

奪標熱門德國喺G組對住美國、葡萄牙同加納冇乜受考驗，以2勝1和首名出線，今晚16強對住歷史性喺分組賽突圍嘅阿爾及利亞，呢隻「沙漠之狐」有多名主力有法國血統同踢過法國青年軍，撞啱德國若果晉級8強對手好大機會係法國，今晚正好寓賽於操為8強備戰，以德國贏足幾條街嘅實力唔難大勝一場，讓到1.5/2球上盤照捧。

（TVB13及now818台、中央5台周二凌晨4:00直播）

德國喺3場分組賽總共攻入7球，攻擊力有番咁上下，雖然前鋒普多斯基因傷唔踢得，不過仲有已經射入4球嘅湯馬士梅拿，佢喺啱啱嘅德甲球季表現麻麻，但嚟到世盃好似變咗另一個人，先喺首戰對葡萄牙上演帽子戲法，最後一輪對美國亦一箭定江山，依家同美斯、尼馬一齊成為神射手大熱。
謝路美保定膝傷照披甲

德國領隊勒夫上場喺雨戰下淋到濕晒，唔少球迷都讚「濕身勒夫」勁有型，不過佢尋日被記者問到有冇興趣轉「賭神頭」，將啲頭髮梳晒向後時就咁話：「嗯，唔得啦！我嘅髮型唔會變，亦唔準備改髮型。」呢位型仔領隊仲透露已經度好正選陣容，話後防謝路美保定膝頭有輕傷，但應該唔影響上陣。
阿爾及利亞「法青」孭飛

對手阿爾及利亞能夠殺入16強已經係超額完成，歷史性首次躋身淘汰賽階段之餘，又打破長達28年嘅決賽周入球荒。不過我就覺得皆因H組嘅對手實力麻麻，佢哋先可以僥倖出線，如果唔係以球隊3場入得6球，但失咗5球嘅表現，都幾難出到線。況且阿爾及利亞陣中多名主力好似菲侯利、巴謙美、麥贊尼同高林等都有法國血統或踢過法國青年軍，撞啱佢哋條線晉級8強後好大機會遇上法國隊，德國今晚必加多兩錢肉緊（目及）佢哋為8強備戰，即使讓到1.5/2球都撐硬上盤。
Data King：表現慢熱旺開半細

‧德國近10場比賽取得6勝4和。

‧近8場比賽，7度開出半場細。

‧3場分組賽中總傳球次數為2,120次，排名為32強之首。

‧18次闖入世盃決賽周，最差成績要數到1998年，當時8強止步。
Data King：對歐洲球隊未驚過

‧阿爾及利亞近10場比賽取得6勝2和2負。

‧近5場對歐洲隊成績為3勝1和1負。

‧3場分組賽只錄得10次角球，為32強之中排尾4。

‧3場分組賽中只有26次射門，但中框次數為15次，攻入6球，把握力不俗。
乜都玩錦囊：「沙漠之狐」細報仇

阿爾及利亞喺1982年世界盃，畀西德同奧地利夾計踢出局，今次仇人見面，仲唔有仇報仇？「沙漠之狐」縮後嚟踢，德國想入波都唔容易，2.2倍入球細可以諗諗。