美斯一個大起成隊瑞士

猪拉多纳

恨捧盃擸金靴做真正球王

今晚喺聖保羅哥連泰斯球場續演世盃16強大戰，由矢志奪冠嘅「潘帕斯雄鷹」阿根廷硬撼瑞士。阿根廷今屆有王牌美斯單天保至尊，3輪分組賽轟入4球弗到冇朋友，淨係佢一個已經足以大起你成支瑞士啦！更何況瑞士中堅佐羅甩漏多多，猶如一枚「計時炸彈」，隨時「助攻」畀想擸埋金靴獎嘅美斯數多幾粒，因此大盤比主W更加值博。

（TVB 13及19、now 818及840周三凌晨零時直播）
展現恐怖統治力

美斯有幾弗？喺前線隊友阿古路受傷、希古恩缺態嘅情況之下，佢唔單止3場入4球帶領球隊全勝晉級，仲要係粒粒都咁關鍵，大家試吓扣番晒佢嘅士哥，阿根廷在分組賽只會係2和1負得2分，連淘汰賽都入唔到。斯維近年專攻西甲，睇番上季美斯喺巴塞嘅表現，谷極都谷唔起，嚟到世盃就踢到曉飛，完全係判若兩人。姑勿論美斯之前勒住勒住係咪為咗喺世盃留力，佢已經證明自己喺國家隊，已經可以發揮出喺巴塞單天保至尊嘅恐怖統治力，希望用世盃冠軍奠定球王地位，淨係呢份決心都值得支持喇！

瑞士雖然闖入16強，但以佢哋坐擁梳頓沙基利、恩拿、列治史迪拿同比哈美等唔錯人腳，又有名帥希斯菲特掌舵，但論表現就認真麻麻，首仗僥倖反勝厄瓜多爾，次仗遇着較強嘅法國，即失5球超肉酸，雖說上仗靠梳頓沙基利連中3元擊敗弱旅洪都拉斯，但後者若非欠運中楣中柱，至少可追番兩粒。其實瑞士嘅問題癥結在於防線，自從老將中堅雲貝根傷出後，主帥希斯菲特焗住讓佐羅「廖化作先鋒」，可惜呢位漢堡守將始終係扶不起嘅阿斗，失魂、漏波、跣腳樣樣齊，被法國血洗正係佢與辛德路斯呢對「前阿仙奴甩漏組合」嘅傑作。
佐羅防線計時炸彈

預計希帥今仗唔敢再起用辛德路斯，只不過一個佐羅就已經夠「驚嚇」，假如法國嘅賓施馬同基奧特都足以搞到佢咁狼狽，「神級」美斯仲唔玩到佢一戙都冇咩？加上哥倫比亞新星占士洛迪古斯已經有5球進帳，美斯如果要爭埋神射手，今仗面對防線穿窿嘅瑞士正係增添士哥嘅好機會？不過，考慮到阿根廷條防線其實一樣唔多穩陣，如嫌主W太熱冇肉食，又驚讓球主勝未必開到，不過轉玩有1.82倍嘅入球大更佳。
歷來6度交鋒阿根廷未輸過

阿根廷同瑞士歷來交手6次，其中有4次係瑞士主場，阿根廷未嘗一敗，累積4勝2和兼合共只失3球。兩軍喺決賽周史上有過1次對碰經驗，當時係1966年英格蘭世界盃，阿根廷喺分組賽階段淨勝瑞士兩球。而佢哋最近嘅一次對賽喺兩年幾前嘅一場熱身賽，當時係瑞士主場，但係阿根廷喺20分鐘已由美斯打開紀錄。雖然瑞士下半場一度靠梳頓沙基利扳平，但係美斯喺完場前連下兩城完成帽子戲法，協助阿軍以3比1取勝，以往績而言，阿根廷絕對可以話係瑞士嘅剋星。
艾歷臣富豪判官唔多派牌

國籍：瑞典

年齡：40

曾執法大賽：歐聯、歐霸盃、歐超盃、12歐國盃

簡介：有米球證又嚟喇！瑞典球證艾歷臣係千萬富豪，以老闆級身份擔任球證，肯定公正無私，至少唔怕被收買，尤其是今屆世盃一度傳出假波疑雲，曾有指球證係收買對象，今場有艾歷臣喺度，相信唔會存在呢個問題。佢今屆執法過兩場波，就係美國贏加納2比1同巴西贏喀麥隆4比1，兩場都開入球大，而艾歷臣喺呢兩場波都唔輕易畀牌，兩場加埋只係派咗5張黃牌，似乎手緊咗啲喎。

執法場數：91

黃牌數：326

平均黃牌數：3.58

紅牌數：16

平均紅牌數：0.18

判12碼：16

平均判12碼次數：0.18
今屆派牌：

黃：5

紅：0
阿根廷

主要後備：15迪米捷利斯(後衞)、6碧基亞(中場)、11麥斯洛迪古斯(中場)、19列卡度艾華利斯(中場)、18柏拉斯奧(前鋒)

入球球員分布：美斯(4球)、馬高斯盧祖(1球)、對方烏龍球(1球)

入球時間分布：0-15分鐘(2球)、16-30分鐘(0球)、31-45分鐘(1球)、46-60分鐘(1球)、61-75分鐘(1球)、76-90分鐘(1球)

黃牌在身：馬高斯盧祖
瑞士

主要後備：3薛格拿(後衞)、6米高蘭治(中場)、15迪斯馬利(中場)、16基爾臣費南迪斯(中場)、9施費洛域(前鋒)

入球球員分布：梳頓沙基利(3球)、美密迪、施費洛域、迪斯馬利、格列沙加(各1球)

入球時間分布：0-15分鐘(1球)、16-30分鐘(0球)、31-45分鐘(0球)、46-60分鐘(2球)、61-75分鐘(1球)、76-90分鐘(3球)

黃牌在身：佐羅
法達斯維推介：入球大