諾在其中:（馮諾嘉）尊係贏變化地醒

不死鸟

 周日沙田賽事跑完第八場後因天雨關係取消，小妹屋企對正一千米起步點，記得嗰朝出外做賽馬節目，當時天氣已經好唔穩定，中午回程時雨勢極大，但賽事依然喺一點鐘開跑。

        嗰日三T同六寶獎都有多寶，難怪場地情況唔理想，但對馬迷嚟講肯定仍有吸引力，就連小妹亦買咗唔少，而且估計有機會連場爆冷，搞到仲拖多幾匹冷腳。結果跑完第八場亞視盃後取消賽事，自己就覺得有啲畀人搵笨，既然馬會明知天氣差，咁點解要拖到第九場先唔跑﹖咁做唔通係為咗遷就贊助商﹖但如果早段場次因為場地問題發生意外，咁到底邊個要負上最大負任﹖既然騎師隨時有危險，馬迷輸錢又唔會服氣，點解馬會唔早啲作出取消賽事嘅決定﹖最多咪安排補賽囉﹗但最好笑係當馬會宣布賽事腰斬後，雨勢反而好似減弱咗，如果原本諗住喺尾兩場搏殺嘅騎練甚至馬迷，只好嘆一句天意弄人。

排四檔形勢有利

        聽晚八場谷草賽事，估計又會喺變化地上舉行，初步心水係第一場五班千八米嘅「尊係贏」，呢匹十歲老馬季內六戰三度上名，其中上仗喺谷草一哩跑第二，輸畀頭馬「心頭好」僅一條頸位，證明仲有兩腳。呢次抽得四檔上陣，多匹對手如「年年如意」、「京城天寶」同埋「活威小子」等均抽排大外檔，形勢蝕底兼呢幾匹馬亦算係失準分子，反而「尊係贏」老馬必拼兼見水即生，續配最佳拍檔黎海榮，有力先拔頭籌。