哥斯達黎加466萬人的神話

猪拉多纳

足球場係英雄地，優勝劣敗！但係冇必要喺傷口上灑鹽，亦唔需要錦上添花。依家8強當中，唯一令人意外嘅球隊係人口只有466萬嘅小國哥斯達黎加，佢哋成功殺入8強絕對唔係僥倖，唔係阿Q精神，世界盃已經係屬於哥斯達黎加！

完全冇人諗到哥斯達黎加喺「死亡之組」以首名出線，就算身陷3隊前世盃冠軍角力嘅夾縫當中，球員一早表明絕非志在參與，反而要燃亮鬥志，堅拒任人魚肉，結果憑着防守反擊戰術，取得漁人之利。
鋼門拿華斯見慣大場面

哥斯達黎加唔單止幾個守衞，幾乎全隊都有出色嘅防守技術，喺世盃要盯死世界級前鋒，一定要表現出效率，呢隊波成功做得到，就有贏波嘅機會。而門將基羅拿華斯嘅表現神勇亦唔係偶然，佢効力嘅西甲利雲特經常畀皇家馬德里同巴塞隆拿攻到甩肺，見慣大場面，世盃當食生菜啦！

唔少頂級球星喺比賽中疲態畢露，原因係漫長賽季加上舟車勞頓，嚟到世界盃自然「散散哋」。而哥斯達黎加只有少數球員効力頂級聯賽，可以養尊處優備戰，但係經過呢次一鳴驚人嘅表現，球員自然成為富豪球會對象，以後會點冇人知，最重要捉緊眼前嘅燦爛！