巴西始終係南美1「哥」

猪拉多纳

世界盃已經進入最後直路，睇番16強比賽好多場都咬得好緊，尤其阿根廷對瑞士，相信大部分人賽前都冇諗過要踢加時先分到勝負，阿根廷雖然發揮一般，但真係贏在球員級數，瑞士輸波無話可說。16強開完一輪下盤後，8強隨時又轉攤路，大家要小心。

今晚兩場8強大戰，東道主巴西對哥倫比亞，巴西上場踢得差累死唔少上盤客，但今場仲要讓半一，嗰盤相當硬淨。哥倫比亞愈踢愈好，尤其中場占士洛迪古斯被捧到上天，預計今場會好聚飛，不過兩支南美球隊拍埋，巴西始終係美洲「一哥」，有格食格味道，逐個秤點都贏你，呢場捧上盤。
法德五五波玩大好過

另一場法國對德國就係一場五五波，初盤由德國讓平半至讓半球都有，德國讓平半上盤可以考慮，但如果去到讓半球就寧願博法國，其實兩隊今屆表現差唔多，未踢過真係唔知鹿死誰手，與其要勉強揀邊隊贏，不如揀大盤更佳，事關兩隊好多主力喺球會級賽事已經踢慣踢熟，相信好快可以入局，有機會出現好多入球。