巴西玩無鋒陣仲難奏凱哥

猪拉多纳

哥倫比亞喺今屆賽事表現出眾，殺入8強硬撼東道主巴西，將遇上真正考驗。不過哥國已經連贏4場，以「小王子」占士洛迪古斯為首嘅鋒線更係弗到漏油。相反「森巴兵團」今屆表現大起大跌，今戰更有意臨時變陣改踢「無鋒陣」，又有中場核心路爾斯古斯達禾停賽。哥國受讓半一，1.84倍下盤抵捧啦！

（TVB13及now818台、中央5台周六凌晨4:00直播）

哥倫比亞今屆表現贏盡掌聲，到目前為止4場比賽都係表現較好一方，但我認為佢哋之前4場對手實力都唔及佢哋，哥國連落後都未試過，確實未經考驗。今場對住巴西，我估終於可以見到真章，問題係以現時兩隊狀態，哥倫比亞都仲係略勝一籌。
哥倫比亞攻擊點多

呢支南美勁旅進攻節奏快上快落，默契可以話係32強中最好，進攻中場「占洛」4場入5球，狀態弗到飛起。不過入得波多並唔等於球隊淨係靠佢一個，古達度、保羅艾美路同辛尼加等球員都好肯走動，拉散對方防線，隊友更易搵到空位入楔，令攻門機會變多。
尼馬做「假9」 改打3中堅

另邊廂，巴西領隊史高拉利針對哥倫比亞嘅攻擊性踢法，有意轉打3-4-3「無鋒陣」，日前練波特別抽起之前表現乏善可陳嘅箭頭費特，由中堅軒歷基阿祖安奴代替改打3中堅，丹尼爾同馬些路就變成翼衞，尼馬推前半格擔任「假9」前鋒。咁樣雖然有啲新意，但「臨急抱佛腳」突然變陣，我唔認為咁就可以頂得住哥倫比亞嘅攻勢，中場冇尼馬帶起，活力亦即時差一大截，進攻力隨時大受影響。

況且巴西仲有防中路爾斯古斯達禾要停賽，由荷西保連奴頂替，呢位中場喺國家隊定位唔清晰，一直表現唔到佢嘅優點，出佢會拖慢巴西嘅節奏，今場仲要對住好肯壓迫對手嘅哥倫比亞，肯定錯漏百出。巴西打到8強先嚟變陣，又有中場大將唔出得，咁都要讓哥倫比亞半一，呢個上盤真係信唔過。
Data King：近4次交手全和

‧巴西近10場比賽取得8勝2和。

‧「森巴兵團」往績佔優，歷史上對賽25次，取得15勝8和2負。

‧2004年至今4場對賽皆和波收場及全開細，有3場開0:0。

‧近5屆8強成績，4度開全場大。
Data King：近10次對賽9開半細

‧哥倫比亞近10場比賽為7勝3和。

‧歷史上對賽25次，合共炮製66球，平均每場入2.64球，惟哥倫比亞僅取得11球進帳。

‧近10場對賽，9度開出半場細。

‧世盃分組賽合共攻入9球，得球僅次於荷蘭。
乜都玩錦囊：哥倫比亞去盡玩大佢

哥倫比亞喺今屆世盃展現強勁火力，今場對住巴西應該唔會故意放慢節奏，照樣去盡。巴西上場雖然表現差勁，但有尼馬擔正嘅前線仍然唔可以睇小。兩隊拍埋入波唔會少，試2倍入球大無妨。