阿根廷靠晒美斯未必掂

猪拉多纳

歐洲紅魔實力非「比」尋常

今晚世盃8強戰頭場好戲碼，由「潘帕斯雄鷹」阿根廷火併比利時，阿軍雖有美斯單天保至尊見關過關，但喺其他隊友冇乜料到下，場場都贏得勁辛苦，唔單止被傳有「黑影」出手阻礙前進，兼且慘中「7月魔咒」，未必贏到漸入佳境嘅比利時，後者仲有受讓之利，梗係撐「歐洲紅魔」讓球客勝啦！

（無綫翡翠台及明珠台、TVB 13及19、now 818及840周日凌晨零時直播）
7月魔咒持續影響

阿根廷感染「美斯倚賴症」，靠呢位連續4場當選最佳球員嘅王牌入波及助攻，幾經辛苦先晉級8強，睇番前鋒拍檔希古恩狀態欠佳，仍未打破11個月來國家隊入球荒，阿古路亦受傷患困擾，今仗只能暫列後備，而代替佢嘅拿維斯同「辮子前鋒」柏拉斯奧級數有限，得番迪馬利亞比較似樣，如果美斯有乜頭暈身慶或被盯死，「潘帕斯雄鷹」前線將即時癱瘓。

除咗整體發揮未如理想外，由於東道主巴西同阿根廷一向係世仇，當局亦對大批阿軍粉絲湧入國境睇波，但因冇錢住酒店搞到周街露宿嘅擾民行為非常反感，希望佢哋盡快出局，亦等巴西少隊勁敵。睇番阿根廷上仗面對瑞士嘅兇狠打法，球證艾歷臣嘅執法尺度明顯太寬鬆，幾次過火攔截都唔吹罰瑞士，惹來被「黑影」打壓之傳聞，況且佢哋近5屆都被羅馬尼亞、荷蘭、德國等歐洲球隊淘汰，「恐歐症」情況嚴重。

最慘係阿根廷慘中「7月魔咒」，自66年世盃分組賽擊敗瑞士後，該隊從未喺踏入7月嘅世盃賽事法定時間內贏波，仲錄得2和8負嘅劣績。雖然佢哋喺78及86年兩度染指錦標，但咁蹺都係發生喺6月尾，就算90年世盃於7月淘汰主辦國意大利殺入決賽，亦係要靠互射12碼及「神龍」哥高查屢救險勝，因此「潘帕斯雄鷹」每逢7月踢世盃，喺90分鐘例冇運行。
比利時愈戰愈勇

比利時今屆集結夏薩特、費蘭尼、高柏尼等英超球星，隨住頭幾場熱身後，呢班大賽經驗不足嘅「黃金一代」表現漸入佳境，上仗加時險勝美國，只因對方門將侯活演出超水準，更重要係主帥韋莫斯麾下有太多「奇兵」選擇，好似連續兩仗被貶為後備嘅「小魔獸」盧卡古，上仗加時入場即刻入波兼助攻，呢種情景頭兩場分組賽亦曾出現過，與阿根廷太過依賴美斯相比，「歐洲紅魔」喺實力及兵源方面都平均得多。綜合各種因素，思維認為牌面名氣較高嘅阿根廷讓唔起比利時，讓球客勝乃不二之選。
列素利吹咗兩場都開大

國籍：意大利　

年齡：42

曾執法大賽：1意甲、歐聯、歐霸盃、12歐國盃

簡介：列素利正職係建築師，唔使起樓嗰陣就去吹番幾場意甲，國際賽方面執法過2012歐國盃，近年經常為歐聯及歐霸執法，亦係去年歐聯決賽主裁判，好多歐洲頂級球星都同佢交過手，所以今場賽事雙方球員對呢位球證應該唔會陌生。今屆列素利吹過兩場，分別係荷蘭5比1贏西班牙同阿根廷3比2贏尼日利亞，兩場都係多入球大手交易，而今場亦係佢今屆第2次主吹阿根廷嘅比賽。

執法場數：76

黃牌數：297

平均黃牌數：3.91

紅牌數：10

平均紅牌數：0.13

判12碼：25

平均判12碼次數：0.33
今屆執法：

6月14日　B組　西班牙 Vs 荷　蘭

6月26日　F組　尼日利亞 Vs 阿根廷

今屆派牌：黃：6 紅：0
世盃兩遇各勝一仗

阿根廷同比利時歷來相遇3次，阿根廷以2勝1負嘅戰績佔優，而且合共4次攻破對手大門，相反比利時就只有1球進帳。雙方對喺世界盃決賽周碰頭絕對唔陌生，歷來首次對碰就係1982年西班牙決賽周分組賽，當時比利時爆冷以1球力克擁有馬納當拿兼衞冕冠軍嘅阿根廷。雙方喺4年後嘅墨西哥決賽周準決賽再遇，結果阿根廷以2比0成功復仇。
法達斯維推介：比利時 讓球客勝