荷蘭後勁強爆贏哥斯拉

猪拉多纳

無冕鬥神奇爭創歷史

最後一場8強戰周日凌晨於薩爾瓦多新起源球場上演，由三屆亞軍荷蘭鬥今屆神奇球隊哥斯達黎加，呢場係今屆8強戲碼入面、唯一一場兩支球隊都未贏過世盃冠軍。「哥斯拉」哥斯達黎加上一圈和希臘激戰120分鐘消耗極大，而且今仗後防陣容不整，想再創造神話唔容易，不過今場荷蘭讓一球、球半盤口太辣，上盤值博率不高。荷蘭今屆擅於「留前鬥後」，4場比賽都在下半場發力入波取勝，而且領隊尹戈爾多次臨場變陣都有料到，捧3.8倍「和主」更抵玩。

（TVB13及19、now 818及840周日凌晨4時直播）

來到8強階段，基本上已冇高低之分，哥斯達黎加能夠歷史性闖入8強已經係實力嘅保證，不過佢哋上場淘汰希臘付出唔少代價，成為今場爭勝嘅一大隱憂。正選中堅奧斯卡杜亞迪領紅牌今仗停賽，門將基羅拿華斯亦整傷膊頭，缺席了周中一課操練，雖然後者應可趕及披甲，但未知對佢嘅臨場狀態有冇影響，再加上另一後衞萊爾米拿拉傷肌肉唔出得，後防未必可以踢番過去幾場嘅水準。
哥斯達黎加上仗被扯乾

奧斯卡杜亞迪上場對希臘下半場中段已被逐，連同加時哥軍有接近半個鐘頭十人應戰，比賽末段已經舉步為艱，被希臘壓住嚟攻，能否及時恢復十足體力成疑問。荷蘭上場對墨西哥雖然都係喺炎熱天氣下進行，但受益於首次增設嘅「飲水時間」，球員喺心理及體力上都比哥軍有優勢。
主Ｗ太熱博3.8倍「和主」

荷蘭對上三場比賽都係安排於當地時間中午開波，不過整體演出未見受天氣影響，領隊尹戈爾懂得留放亦應記一功。睇番荷蘭今屆踢咗四場比賽都開「半場和」，然後換邊後才發力入波取勝，堪稱最強後勁王，而且荷蘭對上三場贏澳洲、智利及墨西哥，後備兵迪比、利萊費亞及亨特拉爾落場後，分別都能取得奠勝關鍵嘅入球，板凳深度亦係佢哋優勝地方。計埋大賽經驗，相信荷蘭有力在法定時間之內解決對手，但主Ｗ只得1.38倍略嫌偏熱，讓球盤讓一球、球半亦有「贏波輸盤」風險，建議再博有3.8倍嘅荷蘭「和主」。
球證世家畀牌冇手軟

國籍：烏茲別克

年齡：36

曾執法大賽：08、11世冠盃、10世界盃、11亞洲盃

簡介：伊馬杜夫出身球證世家，事關佢老竇都係球證，呢位中亞名哨於08至11年連續4年當選亞洲最佳球證，4年前更為南非世盃揭幕戰執法，以32歲之齡成為自34年來最年輕揭幕戰判官，今屆佢吹過三場世盃賽事，分別係瑞士2比1贏厄瓜多爾，墨西哥3比1贏克羅地亞，以及德國1比0贏美國，三場總共出示8黃1紅，今場由佢主吹荷蘭同哥斯達黎加，當中哥斯達黎加係8強中領紅黃牌最多一隊，共領8黃1紅，睇嚟該隊再攞牌機會甚高。

執法場數：117

黃牌數：202

平均黃牌數：2.58

紅牌數：27

平均紅牌數：0.23

判12碼：14

平均判12碼次數：0.12
今屆執法：

6月16日 E組 瑞士 Vs 厄瓜多爾

6月24日 A組 克羅地亞 Vs 墨西哥

6月27日 G組 美國 Vs 德國

今屆派牌：黃：8 紅：1
A級賽事未交手哥軍世青盃贏過

荷蘭同哥斯達黎加從未喺男子A級賽事對碰過，但就喺2001年嘅世青盃對碰過一次，當時哥軍以3比1取勝，值得一提嘅係依家荷蘭陣中嘅亨特拉爾同洛賓都係當年世青盃嘅其中一員，而領隊仲要係尹戈爾添，所以佢哋都算有過對哥斯達黎加嘅經驗，嗰場世青盃嘅賽事都可以算係一個參考指標。至於「橙軍」喺世界決賽周歷史上總共14次遇上美洲球隊，累積8勝4和2負嘅佳績，以往績嚟講似乎對美洲球隊得心應手。不過要留意嘅係，呢14場賽事中荷蘭嘅對手大多都係南美洲球隊，只有對過兩次並錄得一勝一和嘅墨西哥係來自中北美洲，可見佢哋都係冇咩對中北美洲球隊嘅經驗。
荷蘭

主要後備：12華希亞治(後衞)、20韋拿杜姆(中場)、17謝明蘭斯(前鋒)、19亨特拉爾(前鋒)、21迪比(前鋒)

入球球員分布：尹佩斯、洛賓(各3球)、迪比(2球)、迪維積、利萊費亞、史奈達、亨特拉爾(各1球)

入球時間分布：1-15分鐘(0球)、16-30分鐘(1球)、31-45分鐘(1球)、46-60分鐘(2球)、61-75分鐘(3球)、76-90分鐘(5球)

黃牌在身：迪維積、約拿芬迪根斯文、戴利白蘭特
哥斯達黎加

主要後備：12韋朗法蘭西斯(後衞)、11巴蘭迪斯(中場)、20迪亞高卡禾(中場)、22荷西古比路(中場)、21烏連拿(前鋒)

入球球員分布：拜仁雷斯(2球)、祖爾甘保、奧斯卡杜亞迪、烏連拿(各1球)

入球時間分布：1-15分鐘(0球)、16-30分鐘(0球)、31-45分鐘(1球)、46-60分鐘(3球)、61-75分鐘(0球)、76-90分鐘(1球)

黃牌在身：荷西古比路、基羅拿華斯、拜仁雷斯、艾斯迪賓格拿杜斯、耶仙迪積達、基安卡路干沙利斯
笛子波童推介：荷蘭(和主)