比國前途還看高圖爾斯

猪拉多纳

踢埋今晚兩場比賽，世盃最後4強便告塵埃落定，Peter今屆多次強調暫時冇一支球隊表現完美，惟有防守先係王道。記得分組賽階段，各支球隊為爭出線都踢得非常主動，因而出現了大量入球，但去到淘汰賽階段，傳統強隊唔單止冇一面倒優勢，而且佢哋都怕犯錯而輸波，故此踢法變為保守。站在球迷角度，入球數字急降當然會令可觀性大減，但在領隊角度，唔失波先係贏波嘅第一步。
唔怕Ugly 靜待時機

比利時上場能夠淘汰美國，頭號功臣首推門將泰拔高圖爾斯，如果唔係呢位身高1米99嘅門將擋出美國一個精心保署嘅罰球戰術，兩軍隨時要鬥到互射12碼。高圖爾斯年輕、當打、敏捷，喺Peter眼中絕對係當今球壇其中一位表現最好嘅門將，而且比利時有個好領隊，韋莫斯係新一代少帥中表現比較出色嘅一位，為咗贏波佢唔介意球隊踢「Ugly Football」，佢主張球員先做好防守，然後再靜待對方犯錯尋求入球機會。中場主力夏薩特決賽周前原被寄予厚望，可惜踢到呢一刻表現只係一般，但佢始終係一名可憑一己之力扭轉戰局嘅關鍵先生，萬一阿根廷後防睇少佢一分鐘，隨時要付出沉重代價。

阿根廷雖有當今球王美斯壓陣，但單天難保至尊，而且論整體實力及板櫈深度，比利時更勝一籌，今場絕對有得打。另一場荷蘭對哥斯達黎加，牌面上當然係荷蘭較高，不過哥斯達黎加能夠嚟到此階段絕非單靠運氣，有人認為哥斯達黎加今屆比賽已算超額完成，輸波唔會覺得可惜，但對這個足球小國嚟講，呢個機會可一不可再，難得來到8強，有咩理由唔搏埋去！Peter認為今晚兩場8強未必可在法定時間之內分到勝負，從菠菜角度，不妨小敲一條2串3和波！
Peter金句：高圖爾斯打得有多好，比利時便行得有幾遠！