火燄不設防肯薩斯秤先

猪拉多纳

肯薩斯體育會今周主場對住芝加哥火燄，對手聯賽已經5場不勝，兼有中場數胡之人馬基同後衞祖漢靴達度受傷停影響缺陣，肯薩斯仲唔追住對手嚟打咩？肯薩斯讓半一，梗係要捧上盤啦！

（TVB301台周一凌晨3:00直播）

肯薩斯總算走出5月低潮期，近5場比賽取得3勝2負，雖然今場仲有中場費爾夏柏肩膀有傷，好大機會唔出得，而小將東尼洛迪古斯又告停賽，但相信對戰鬥力唔會有好大影響。尤其係陣中前鋒當姆戴亞今季腳風咁順，到目前為止已經有11球進帳，係球隊排喺東岸聯賽榜首嘅一大原因，以芝加哥嘅防守，真係好難看實佢。

芝加哥防守曳係今季成績差勁嘅主因，佢哋今季踢咗17場正式比賽，只得1場可以保住清白之身，真係前面入幾多球都好，後防都可以幫你嘔番晒出嚟！依家已經有4球進帳嘅中場馬基又有傷唔出得，鋒力大大減弱，防線又有祖漢靴達度被罰停賽，以佢哋咁殘嘅陣容對住肯薩斯，莫講話要贏，想唔失波都難，所以呢個上盤撐得過。