尹戈爾阿積士Magic重現

猪拉多纳

英超曼聯喺世盃前宣布搵尹戈爾做主帥，Peter當時以為紅魔高層今次眼光出錯。事關尹戈爾過去幾年教名牌球隊都「唔掂」，Peter以為95年阿積士大師嘅法術已經隨時代消失。不過，睇完今屆世盃後，Peter覺得自己今次睇錯咗。

荷蘭今屆嘅陣容未必好過2010年攞亞軍嗰屆，成功打入4強明顯係尹戈爾95年代阿積士嘅Magic重現。Peter素來鍾意研究一眾名師嘅教法，學多一啲去做教波嘅思維，今次可以話係經典式書本教材。
為低估佢自打嘴巴

尹戈爾明知荷蘭陣容唔算整齊，前線僅靠洛賓及尹佩斯攻堅，如果中後場用舊將就會束手就擒，所以夠膽用新人好似馬田斯恩迪等，肯用新人而唔緬懷過去，Peter覺得呢招非常有效，同時好敬佩尹戈爾嘅做法。

喺荷蘭對墨西哥嘅8強戰，尹戈爾喺「飲水時間」向一眾球員教路，話畀球員知會用最簡單嘅長傳急攻收復失地，同時換入亨特拉爾攻堅，結果就憑後者一傳一射帶領球隊贏波。夠膽喺呢個時候換入之前冇咩上陣嘅亨特拉爾，仲要由後者射入奠勝嘅12碼，足見尹戈爾係「知人善用」。

到8強對「灰姑娘」哥斯達黎加，荷蘭受制於對方門將基羅拿華斯嘅出色表現，尹戈爾已經一早諗定換門將應付12碼，可以話係眼光遠大。尹戈爾賽前已經同門將告魯爾講，互射12碼會搵佢守龍門，等佢有心理準備同做好research，同時又唔話畀正選門將施利臣知會換出佢，以免影響後者嘅演出。

Peter之前只係喺美國隊際運動同埋莫連奴教波時見過呢招，名帥果然係要顧及好多嘢，難得呢個月有咁多名帥表演，Peter可以話係無限受落，同時亦打自己嘴巴，之前的確低估咗尹戈爾嘅教波能力。