人生就係咁矛盾

猪拉多纳

想德國稱雄 又想美斯圓夢

好想美斯圓世盃夢，加冕球王；然而德國有王者風範，晉級過程充滿說服力，亦好想佢哋4度稱霸，話我係騎牆派？人生就係咁矛盾！不過比賽總要分勝負，個個都想贏，有邊個想做戥人開心嘅世盃亞軍吖？

欣賞美斯，當然唔係因為佢又高大又靚仔，似影帝張家輝啦！其實佢除咗球技好，難得球品都咁好，比賽時好少勞嘈，亦無茅招，印象中極少攞牌，形象正面係球壇一股清泉，所以咁受普羅大眾歡迎囉！

事實上，美斯喺球會級賽事贏盡錦標，國際賽方面，05年捧世青盃、08年攞京奧男足金牌，至今只係同大力神盃無緣，今屆機會嚟喇，仲記得分組賽贏波斯尼亞，美斯打破決賽周入球荒後勁興奮，一次過將抑壓好耐嘅冤屈氣吐清，4強12碼淘汰荷蘭，亦係第一次見美斯笑得咁燦爛，希望佢可以笑到最後啦，不過阿根廷真係無乜邊個幫到佢手，有傷嘅迪馬利亞係就係復操，但狀態成疑，阿古路同希古恩又踢到隱形，睇嚟美斯都係要孤軍作戰，唔知佢最終能唔能夠成為救世主呢？
勒夫從善如流應變則變

計世盃往績，德國近兩屆8強交手都剋住阿根廷，06年射贏12碼，10年仲大炒4粒，心理上絕對佔優。教頭勒夫今屆只選一個前鋒，曾經畀人鬧爆，事實證明佢無錯，就算有錯都即刻改，好似棄用梅迪薩卡，移番拿姆去右閘，以高路斯任箭頭等，佢從善如流，應變則變，亦好有效果吖。德國今屆表現突出，大炒葡萄牙，又狂數足球王國巴西七個一皮，更破紀錄第8次入決賽，成就捨我其誰，當然，捧埋盃就更加完美啦！