筍盤益你:（斑尼）鐵哥們增程有計

不死鸟

  賭馬當然要講彩數，好似周三晚「神鑽福將」一出閘即拋咗勞愛德落嚟，買咗嘅馬迷真係喊都無謂，而第四場「鐵哥們」上仗情況亦差唔多，入閘前拋低蔡明紹後空馬走甩，跑咗幾百米至畀工作人員捉番，馬會居然仲畀佢繼續上陣，就算唔計體力損耗，咁樣搞一搞，唔多唔少對呢匹初出嘅三歲馬有影響，但嗰場田草千二米賽事「鐵哥們」最終輸兩個多馬位跑第四，表現令人喜出望外。

        「鐵哥們」出自07年香港國際拍賣會，身價六百五十萬全場最貴，可惜上季尾右前腳不良於行退出，搞到今年五月九日先至首次登場，既然賽後操練積極，相信腳患已完全康復。計上仗走勢，今次「鐵哥們」轉跑千四米可能仲啱發揮，加上跟「蓮華生輝」同父，估計亦係早熟分子，質新馬抽得三檔必有利，值得優先留意。

       德國盃決賽今晚喺柏林奧林匹克球場上演，既然利華古遜同雲達不來梅都冇主場之利，到底邊一隊可以捧盃食尾胡﹖計今季表現應要秤先雲達不來梅，而足智彩主客和初盤亦以佢熱啲，讓球盤則要讓平手半球。

捧雲達讓球客勝

        睇番今季雲達不來梅成績，由於早期要分心出戰歐聯，出局後又要轉戰歐協同德國盃，似乎球會上下早已立心放棄聯賽，所以最後以第十名過終點，根本跟表現唔成正比。如果唔係前鋒曉高艾美達、中場靈魂迪亞高停賽，歐協盃冠軍未必由薩克達歷史性奪標﹔話晒今屆不論喺歐聯對國米，又或者歐協鬥AC米蘭，雲達均入波兼未輸過，證明級數上絕對勁過利華古遜。

        相反，利華古遜喺煞科戰作客大敗畀科特布斯，雖然話打少一個，但對住一隊榜尾弱旅居然冇波入，表現絕對唔收貨﹔既然呢隊波唔多擅踢作客賽事，今次對住雲達肯定冇着數，一於捧讓球客勝。