迪祖亞拿普奏凱歌

猪拉多纳

斟掂艾蘭高火力升呢

墨西哥喺巴西世盃表現Sharp醒，16強仲幾乎搞死荷蘭添，相信唔少球迷都對呢個北美國家另眼相看。世盃曲終人散，新一季墨超話咁快就會喺聽朝開鑼，迪祖亞拿季前獲委內瑞拉球星艾蘭高加盟，戰鬥力比上季更強，對住普埃布拉可秤先，1.5倍主W趁熱食。

（開賽時間：周六早上10:30）

迪祖亞拿唔係咩傳統勁旅，不過呢班波有個特色，就係全墨超最多美國球員嘅隊伍，足足有6個，但講到成隊波嘅關鍵人物，肯定非教練法里亞斯莫屬！呢位委內瑞拉教頭上季接掌之後，即刻帶隊喺秋季聯賽以第7名衝線，仲率領迪祖亞拿歷史性躋身中北美洲冠軍盃4強，喺佢掌舵之下，成班波已經去到另一個Level。
委內瑞拉教頭有料到

上季表現咁好，但法里亞斯依然唔多滿意，話陣中球員配合唔到佢嘅戰術，呢位曾經教執委內瑞拉國家隊嘅名帥，於是喺季前打友情牌，斟掂同胞艾蘭高加盟。

艾蘭高去季喺德甲慕遜加柏都仲踢得掂，嚟到墨超，超晒班啦！仲有，法里亞斯仲對症下藥，簽入翼衞伊斯利占美利斯同前鋒戴路摩蘭奴，火力夠晒猛。
普埃布拉簽10人欠默契

對手普埃布拉近季表現令人失望，自2010年開始未試過殺入聯賽榜前10，主帥羅曼奴季前簽咗10位球員返嚟，霎時間咁多生力軍，培養默契都要時間啦！最黐線嘅，係會方竟然羅致墨西哥「夾波王」白蘭高，噱頭就夠晒，但呢位前國腳已經41歲，仲點會幫到隊波吖？今仗造訪迪祖亞拿唔慌有運行！