布加勒斯特星隊過關穩膽

猪拉多纳

歐洲主要聯賽未開鑼，但歐聯外圍賽已打到如火如荼，今晚上演第2圈次回合，阿King推介布加勒斯特星隊主場對史卓加斯特，羅馬尼亞老牌球會星隊近期演出Sharp醒，繼首回合作客1比0擊敗挪超球隊史卓加斯特後，亦於羅聯盃贏同市死敵迅速，證明季前備戰工作做得好成功。反觀史卓加斯特分心聯賽爭標，兩條戰線實在兼顧唔到，連番受挫之下今仗凶多吉少，主W屬過關佳選。

（周四凌晨1時30分開賽）

星隊堪稱羅馬尼亞史上最成功球會，曾奪得86年歐冠盃（歐聯前身）冠軍，89年打入決賽，上屆亦進身分組賽。以星隊嘅級數，應付外圍賽第2圈，可謂綽綽有餘，首回合作客照贏史卓加斯特，證明實力凌駕對手，更加何況今仗有地利，勝算更高，應會爭取盡快入波奠定晉級優勢。史卓加斯特首回合不敵星隊後，上仗聯賽又輸波，可見球員面對頻密賽程根本吃不消。加上逐漸被挪超榜首莫迪拋離，士氣難免受挫，難擋強勢嘅星隊。
馬模讓唔起捧對家

另一支北歐球隊、瑞典超代表馬模作客拉脫維亞球隊雲特史比斯，馬模近期死晒火，首回合主場都入唔到波悶和0比0，上仗聯賽打和卡爾馬1比1，今仗想攻陷對手並非易事，馬模讓波寧揀雲特史比斯讓球主勝。另外，聖巴特里主場對歷基亞，雙方首回合打和1比1，愛爾蘭球隊聖巴特里有作客入球優勢，悶和0比0都可以晉級，應會踢穩守突擊。波蘭球隊歷基亞近四仗輸三仗，冇能力讓波，要聖巴特里下盤。