拿根亞追打藍十字

猪拉多纳

聽朝墨超壓軸戲碼，拿根亞主場硬撼藍十字。上季「一哥」藍十字喺揭幕戰出閘脫腳，主場輸波不特止，仲激到啲球迷喺場內瘋狂掟嘢發洩，照道理今場梗係要生性贏波安撫吓擁躉，可惜班波仲未上力，遇上格食格嘅拿根亞，睇怕都幾難發圍，2.15倍主勝夠分頭博得過。

（開賽時間：周六早上10:30）
藍十字新兵未磨合

首輪聯賽喺主場出擊嘅藍十字，遇着前線猛將安拿華倫西亞轉投韋斯咸而火力大減嘅帕丘卡，被對手率先攻破大門已經夠肉酸，點知對手喺下半場接連打少兩件，藍十字都竟然佔唔到甜頭，最後輸波收場，難怪藍軍擁躉被激到紮紮跳亂掟嘢，後衞羅渣里奧查維斯賽後更承認被掟中背脊。

講真吖，講人腳藍十字的確唔錯，曉高柏禾尼、托拉度等名氣響噹噹，借將馬哥法比安更係墨西哥國家隊未來棟樑，弊在佢哋副偈明顯未撻着，根本信唔過。至於藍十字新援賓拿迪路，終於獲批工作證可以落場，巴拉圭國腳施維奧托拉利斯，幫國民會踢完南美自由盃後亦正式加盟，可惜前者同隊友欠缺磨合，難見即時成效，後者更係遠水難救近火。更何況藍十字近年作客拿根亞被食到應，近5次有4次都要擺低3分，今場想唔輸波都好難咯。