曼聯搶韁！羅馬遭殃！

猪拉多纳

尹戈爾發功引導魔性回歸

曼聯由「新魔王」尹戈爾率領下，表現立即脫胎換骨，首仗以一場完美大勝作見面禮，今晚喺美國丹佛市出戰國際冠軍盃A組鬥意甲羅馬，梗係唔好畀佢停，一於繼續數胡，為英超新球季造勢！現時嘅羅馬陣容不整，加上托迪、艾殊利高爾等球星年事已高，遇上回復「魔性」，兼要博取尹帥歡心嘅曼聯勢難招架，預料唔止輸一粒，直取曼聯讓球主勝。

（有線61及201台周日凌晨4時10分直播）
憑威望鎮服更衣室

曼聯上季成績差，唔係因為球員質素下降，只係莫耶斯級數同前主帥費格遜相差太遠，壓唔到場，球星們自然唔聽佢支笛。由尹戈爾接掌帥印，情況即有180度改變，呢位荷蘭名帥排兵布陣功力深厚唔再講，最重要係佢擁有極高威望，能夠鎮住更衣室，團結軍心。

喺尹戈爾強勢領導下，人人都要聽佢話，否則隨時被打入冷宮，強如「英格蘭本地薑」朗尼都唔敢再發牢騷，要專心比賽，保住正選，更何況韋碧克、艾舒利楊格、香川真司、費查等「邊緣人」，更加要把握季前熱身賽證明身價，難怪上仗對洛杉磯銀河，由頭攻到尾，完全唔錫力。而兩名新加盟嘅勞基梳爾同安達靴里拉，上賽亦表現對辦，今仗二人將雙雙正選，以加快融入紅魔戰術體系嘅速度，可預期曼聯今仗會繼續搶韁，力爭炮製另一場大捷。
陣容不整老將撐住

至於羅馬上仗熱身賽雖然小勝利物浦，但好大程度上因對手派出大量副選出戰，反映唔到實際狀況。其實羅馬今次美國之旅人腳並唔齊整，包括缺少波斯尼亞中場比真歷、巴西右閘馬爾干等主力。新簽嘅施度基達及艾殊利高爾，分別已經34及33歲，加埋37歲嘅托迪，成隊波變咗「元老隊」，亦反映意甲吸引唔到高質素且當打嘅球員加盟，論整體人腳，難同曼聯相提並論。

事實上，就算羅馬幾年前處於高峰期，喺歐聯對住曼聯一樣要捱打，包括07年作客慘敗1比7，以意甲水準滑落速度，羅馬現時落後曼聯嘅距離肯定更加遠，今場輸少當贏。